O loo faatali le lalolagi atoa pe o le ā le tali a Anthony Joshua i le ofa matautia a Deontay Wilder ua tuu atu mo ia, e $50m e fusu ai ma Wilder.
Na faateia le lalolagi o fusuaga i le vaiaso na tea nei ina ua folafola e Wilder lana ofa tupe mo Joshua. E foliga mai o loo taumafai Wilder e fosi le fusuaga ma Joshua. O le fusuaga lenei o le a tuufaatasia ai Fusi uma o le Lalolagi WBA, WBO, IBO ma le IBF ma iloa ai le siamupini moni o le lalolagi.
E fa vaega o le ofa a Wilder. Muamua, o le $50m o le tupe lea a Anthony Joshua e maua. O le ofa maualalo lea, e le pa’u i lalo o le $50m, ae e mafai ona sili atu le tupe e maua e Joshua pe a ova atu ma le $100 miliona le tupe e maua mai le fusuaga. O le isi vaega tupe $50m o le a faatino ai tapenaga o le fusuaga ma vavae ese ai foi se tupe mo Wilder.
O le vaega lona lua o le ofa, e leai se isi lava fusuaga a Joshua e toe faia i luma mai o le fusuaga lea ma Wilder, e faapea foi ia Wilder. O le vaega tolu, e pule Wilder ma lana pulega i le nofoaga e fai ai le fusuaga. O le faamoemoe o Wilder o le a faatino le fusuaga i Amerika. O le vaega fa, e leai se fusuaga e toe faia a laua nei (Rematch). O ai lava e faia’ina, e le mafai ona toe foi mai e lu’i le fusi.
Na momoli sa’o le ofa a Wilder ia Eddie Hearn le pulega a Joshua, e auala i le imeli. Toe faaopoopo iai ma le Instagram post a Wilder ia Anthony Joshua e vaai lana meli i le ofa ua lafo atu pe talia pe leai.
Ae o le lave o le ofa a Wilder o loo fesiligia e le pulega a Joshua le moni ma le faamaoni o le ofa a Deontay Wilder ma lana pulega. Na ta’ua e Eddie Hearn e leai se Feagaiga na lafo atu ma le ofa (Contract) o lona uiga e le moni. O ofa uma, e lafo faatasi atu ma le konekarate, e faapepa ai faaupuga, ma vaega uma o le ofa. Fai mai Hearn e lei iai se tulaga faapea i le ofa na avatu.
O le tali a Hearn, e leai ni Feagaiga ma ni ofa e fai i luga o le Instagram, e lē o le masani lea o le faiga o ioega e aafia ai tupe tetele faapenei.
O le isi faaletonu, na iai le faamoemoe e feiloai Hearn ma le pulega a Wilder i le Aso Faraile o le vaiaso na tea nei e talanoaina le fusuaga, ae ua faailoa e Hearn e faalua ona sui e Shelley Finkel mai le pulega a Wilder le la feiloaiga. O lona uiga ia te ia e le moni le ofa a Wilder. O le mataupu tāua mo Joshua ma Hearn, pe faapefea ona faatupe e Wilder ma lana vaega le $50m. Na ta’ua e Hearn i le vaiaso na tea nei, afai e moni le ofa ma vaai i le seleni ua ofa atu, e tatau loa ona faatino le fusuaga. O loo saili e ia le moni o le ofa lea pe o fea foi e sau ai le seleni tele ua folafolaina e Deontay Wilder mo Anthony Joshua.
Ua faaalia ai e Wilder lona lē fiafia tele i le fesiligia e Hearn o lana ofa. Ua lau ai e Wilder le “pepelo” o Hearn ma Joshua i le lē talia o lana ofa. A’o fai finauga a itu ia e lua, ae o loo faatali le lalolagi atoa i le faataunuuina o le fusuaga lea, auā le tuufaatasi o fusi uma o le lalolagi.
