O lenei vaiaso na tulai mai ai se tulaga maoa‘e i le va o le Malo a National ma le Pulega i Aukilani ina ua fao faamalosia e le Malo a John Key le pulega o fanua i le tutotonu o Aukilani, e aafia ai ma fanua tulalata i le uafu i Aukilani lea o loo faaaogā mo le faatinoga o faafiafiaga ma le faalauaiteleina o taaloga lakapi mo le Ipu a le Lalolagi.
E maoa‘e lenei faiga ona e lei logoina aloaia e le Minisita o Lakapi i le pulenuu o Aukilani, le susuga ia Len Brown ma lana pulega i Aukilani, o le a faia e le Malo le faoina faamalosia o lenei vaega o eleele e faasino ia Aukilani.
Na faateia le susuga ia Len Brown i le faaiuga a le Malo e faatatau i le faoina o se vaega o eleele i Aukilani, ina ua valaau atu le autusitala ma fesiligia i sona taofi i lenei faaiuga, ma tali ai loa o ia o loo pogisa i lea faaiuga.
Fai mai nisi o le aufaigaluega o le Pulega i Aukilani, o latou ua faateia faatasi ma le susuga i le Pulenuu, ona sa feiloai lelei ma le Minisita o Lakapi faapea ma sui a le Malo e faatalanoa auala e faaleleia atili ai le faagasologa o feoaiga o tagata lautele i Aukilani, ae leai lava ma se tala, poo se musumusuga foi a se isi mai le Malo o lea ua fuafuaina le faoina faamalosi o le pulega o fanua i Aukilani.
O lenei faiga ua atagia ai le sauā o le pulega a le Malo a John Key ma le latou lē amanaiaina o le susuga a Len Brown le Pulenuu fou o Aukilani, auā o lenei faiga o se faiga ua faailoa atu ai i le lalolagi atoa, ua lē faatuatuaina e le Malo Len Brown ma le Pulega atoa o Aukilani i le faafoeina o le faagalosoga o tapenaga o taaloga mo le Ipu o le Lalolagi i Aukilani.
Afai foi ua tua‘i le sese ia Len Brown ma le Pulega fou i Aukilani, o le fesili o ai na faatuina le pulega fou lea ua iai nei ma le auivi fou o lea pulega? O le tali – o le Malo a John Key na faatuina le pulega fou ma le auivi o lenei pulega fou ua pulea nei Aukilani ina ua latou faalēaogāina pulega tuai sa iai i Aukilani.
O le isi foi itu, ua leva ona finau atu Len Brown ma le pulega o Aukilani aoao i le Malo a John Key ua tatau ia i latou ona faatupeina vave le lava o tapenaga o fuafuaga e faafaigofie ai le feoai o tagata lautele i le taimi o taaloga lakapi mo le Ipu a le Lalolagi, ae peitai na teena lava e le Malo lenei finau.
Sa tele foi taimi na fesiligia ai e le Itu Agai le faigamalo a John Key poo ua lava sauni ma lelei tapenaga mo le faagasologa ma le feoai o tagata lautele – ae tali mai lava John Key ma ana Minisita o Lakapi ma Feoaiga (Transport) – ua lava sauni ma tapena i ai.
Peitai ane, o lea la ua amata taaloga ma o loo maimoa mai i ai le lalolagi atoa ia Niu Sila, ae ua alu tala na faaletonu lava auala sa feoai ai tagata lautele i le pō na tatala aloaia ai taaloga o le Ipu a le Lalolagi.
O nisi o le aumaimoa e taunuu atu i le Eden Park sa fai ai taaloga, ua latou misia le amataga o le tatalaga o taaloga lakapi o le Ipu a le Lalolagi.
E lē gata i lea o lea foi ua alu faamatalaga ua lē amanaia e le Malo a John Key ma ana minisita le Pulenuu Aoao o Aukilani e fua lea i le latou faoina faamalosi o fanua ma eleele o loo i lalo o le pulega a le Pulenuu ma le Pulega a Aukilani, e aunoa ma le logoina muamua i ai.
Ua avea foi lenei vevesi ma mafuaaga ua tuufesili ai lava le Itu Agai ma le toatele foi o nisi o Niu Sila – o ai na tusia le lauga lea na faia e le alii Palemia i le pō na tatala aloaia ai taaloga lakapi o le Ipu a le Lalolagi?
Ua mafua lenei fesili, ona o le talitonuga a le toatele o matou e lei lava tapega le alii Palemia mo lea pō. Atonu e lei mamafa i le alii Palemia le tāua sa tatau ona faatāuaina ai lana lauga i lea pō, ona o mata uma o tagata o le lalolagi ua silasila ma maimoa mamao mai ia Niu Sila.
Na manaia le faafeiloaiga e Māori, manaia faafiafiaga uma faatasi ma siva, faapea foi pese o lea lava pō, ae oo mai i le lauga autū a le Palemia o Niu Sila, ua telē le faaletonu.
Muamua, ua leai ma sona manatu e faaaogā le gagana a Māori ma gagana foi o le Pasefika e faafeiloai ai tagata lautele e pei ona masani ai Niu Sila. O le ā sona lagona ina ua faaaogā e le Peresitene o le Iuni Lakapi Faavaomalo le gagana a Māori?
E lē gata i lea ua leai ma se manatu o le alii Palemia ia ona amanaia le Taitaifono o le Iuni Lakapi a Niu Sila lea sa galue ma le malosi ia aumai taaloga lakapi o le Ipu o le tausaga 2011 i Niu Sila, ma leai foi sona manatu e amanaia Tuifaasisina Bryan Williams o le Peresitene fou o le Iuni Lakapi a Niu Sila. E leai foi sana faamanuiaga mo le aulakapi a Toga na o le All Blacks lava.
E iai lo‘u talitonuga, ona o Niu Sila lea e talimalo i taaloga, sa tatau lava i le Palemia ona momoli sana faamanuiaga ia Toga ma aulakapi uma, faato‘ā ave ai lea o sana faamanuiaga mo le ‘au a Niu Sila.
Sa ou manatu foi, faato‘ā oo mai lea o le sailiga siamupini o le lakapi mo le Ipu a le Lalolagi i Niu Sila, o se avanoa lelei lea e faailoa atu ai i le lalolagi atoa o Niu Sila o se atunuu felanulanuai o le Pasefika, ma faailoa ai i lona faaaogāina o gagana eseese a Māori ma le Pasefika e faafeiloai ai le lalolagi i lea pō. Peitai ua misi atoa lenei avanoa matagofie.
O nei faiga o se ata faataitai lea o mea e ono tutupu mai i le lumanai i lalo o lenei Palemia. E ui i lea e misi loa le avanoa, ua lē mafai lava ona toe maua. Aua ne‘i misia lou avanoa e lesitalaina ai oe ma lou aiga mo le faiga palota a Niu Sila i le aso 26 o Novema 2011.
