O le vaiaso ua mavae sa momoli ai le faasea tusitusia a le vaega faaupufai a le Leipa i le Fofoga Fetalai o le Maota Fono Faitulafono Aoao o le Palemene a Niu Sila, e faasaga i le amio le talafeagai a le faipule o le vaega faaupufai o le ACT Party.
Ua mafua lenei faasea ona ua taumafai lenei alii faipule e faafefe faamalosia nisi o le aufaigaluega o le Matagaluega o le Falepuipui a o momoli le molimau a lenei aufaigaluega i luma o se tasi o Komiti a le Palemene o loo iloiloina le mataupu o falepuipui.
O le fuafuaga a le Malo a le National, ua naunau ina ia tuuina atu le faafoeina o falepuipui e galueina e le aufaipisinisi ma faakonekarate i ai le aufaigaluega a le Malo o loo galulue i le Matagaluega o Falepuipui.
O le mataupu lea o loo iloiloina e se tasi o komiti a le palemene.
O le molimau a le aufaigaluega o le Matagaluega o Falepuipui e tetee i ai i lea fuafuaga.
Fai mai le latou molimau sa faia muamua foi lea faiga a o tulai mai foi le National i le Malo i tausaga o le 1990 ma e leai lava ni tupe sefe a le Malo na maua ai.
E le gata i lea, e leai se popole o pisinisi sa galueina falepuipui e puipui le aufaigaluega.
Pau lava le mataupu sa faamuamua e ia pisinisi o a latou tupe maua ma le tauleleia o o latou igoa.
O le tele o taimi ua nana mea sese a le aufaipisinisi ina ia mafai pea ona faaauau konekarate ma le Malo ma maua ai pea latou tupe.
O le molimau lea na le fiafia ai le faipule o le ACT ma aliali ai loa lona vaavaa i lona taumafai e faafefe le aufaigaluega, ma fai i ai poo latou iloa e le toe maua ni o latou galuega talu ai ia faamatalaga.
A o faatalitali se tali a le Fofoga Fetalai i le faasea a le Leipa, na toe aliali foi uiga le talafeagai a le faipule o le ACT i le Aso Lulu o le vaiaso ua tea.
Ua alualu finauga a sui o le National ma le Leipa, mulimuli ane ua lagolago e le ACT le mau a le National. Fesili loa i ai sui o le Leipa poo le mea e tutoatasi le ACT pe mulimuli filemu lava pei o se mamoe i faatonuga a le National, ae tali ai lea alii pe fia fetaui i fafo.
O lenei ua toe faaopoopo le isi faasea a le Leipa ona o amio le taupulea a lea lava faipule.
O le Aso Tofi sa taumafai ai le Leipa e auala atu i le tamaitai o Carmel Sepuloni e aumai i luma o le maota fono lenei mataupu, peitai ane sa teena e le Malo a le National le faalauiloaina o lenei mataupu.
O le faipule foi lava lenei sa ia lafoina ni faamatalaga e le talafeagai i nisi o le aufaigaluega tamaitai o loo galulue i ofisa a le palemene. Na faapea e punou se tasi o tamaitai e taumafa i le paipa, ae fai i ai faamatalaga a lenei lava alii ma ataata i ai.
Ua fefe loa lenei tamaitai ma ave lana faasea i le Ofisa o le Palemene, ae tali le alii faipule e leai lava se leaga o lana faamatalaga sa tatau ona fiafia i ai le tamaitai.
E leai se mea na faia i ai i lenei alii ona o nei amio le pulea.
E le talafeagai ia uiga o loo faaali pea e faipule o le ACT. E le talafeagai foi i soo se faipule ona faia nei uiga mataga.
E mafua ona ou faamatala ia mea ona ia silafia manino e lo tatou atunuu o le faigamalo lenei a le National ma lana faiga paaga ma le ACT e le o se faigamalo e lagolago pe faatauaina tagata lautele e pei o tatou.
O a latou faaiuga ua faia e aliali mai ai lea tulaga.
E tele mea o loo tutupu i totonu o le Maota Fono e aliali ai o loo nana i tua uiga moni o lenei faigamalo, a o faaaliali mai na o uiga lelei ina ia seetia ai tagata lautele o le atunuu.
Ia manuia galuega ma fuafuaga o le vaiaso fou.
