Faaopoopo tausaga o le matua o le soifua o David Tua, a ua faaopoopo foi ma le televave o ona aao i le taaloga
E ui ina ua manuia ma a‘e malo faiva o le alo o Samoa, le afioga ia Toailetai David Tua e pei ona sa alo i ai, peitai o se fesili taligata tele ua tulai mai i le taimi nei e pei ona faaulutalaina ai le tatou tusitusiga.
O le toatele lava o le aumaitau ma le aufaitau i uiga ma gasologa o lea foi taaloga, o loo latou fesiligia le tulaga o le iai pea o le malosi (power) i le tu‘i ma le agavale kolosi (left hook) a le alii fusu.
E mafua lea manatu ona o le auala sa vaaia, ma taunuu i ai le taaloga i le po o le Aso Toonai na tea nei. Sa manatu le toatele, ailoga e oo i le ono taamilosaga a le alii mai Amerika.
O le talitonuga a le toatele, e tatau ona oti lea alii i le taamailosaga tolu poo le lima pe a tuai.
E eseese lava talitonuga o tagata, o nisi e faavae o latou manatu, pe a fua i faamaumauga o le alii o King, e lē se tagata ta‘uta‘ua tele. E tele foi ni faiaina i le oti poo le (knock out) i nisi o ana taaloga muamua.
O finagalo o nisi sa faavae, ona sa taugā nisi o tu‘i a Tua i foliga ma le auvae o lana paga, ma sa iai le talitonuga sa tatau lava ona palasi ai ma oti lea alii. Peitai sa maua pea lona malosi seia oo ina mae‘a taamailosaga e lei pa‘ū. O vaega lava ia sa tulimatai e le toatele, ma faailo ai o latou finagalo faaalia.
O le polokalame o le faasoa i luga o leitio a papalagi sa faailoa ai le tele o finagalo fiafia ona o le tulaga sa oo i ai ma le faaiuga o le taaloga a Tua. A o le isi vaega lea sa mamafa i ai manatu, o le fesili lava, pe o toe tumau le malosi i le tu‘i ma le kolosi, lea e masani ona lavevea ai le toatele o nisi iloga i le taaloga, ma manumalo ai Tavita.
O nisi o manatu sa faaalia, sa tāua ai le leai o se galuega a le alii o King sa luitauina ai Tua. O lona uiga e leai tele sona tāua, ma sona aogā mo Tavita o lea tagata, pe a vaai i le tulaga o tapenapenaga a Tua mo se avanoa i le siamupini o le lalolagi.
Cedric Krushner (David Tua Promoter)
E ui i ia manatu ma finagalo o le toatele, peitai o se tala mai ia Cedric Krushner, o le alii o loo faalauiloaina taaloga a David Tua i fafo, sa ia ta‘ua ai i le feiloaiga ma le Samoa Times. E lē tāua ia te ia pe oti, pe palasi le alii o King, a o le mea sili ona tāua, o le manumalo.
Na pau lava lea o le tulaga sa manaomia, ma sa fia vaai i ai lea foi tagata ta‘uta‘ua e maitauina ma tulimataia fusuaga. O lona fiafia tele sa faailoa, ina ua mae‘a le taaloga, ma manumalo lelei ma le manino Toailetai, ua lava lea mo ia, e fesoasoani i lana galuega pe a toe taliu i Amerika i le vaiaso nei lava.
Sa faaalia foi e Krushner, o le alii fusu lea o King, e fai lava si malosi tele o lana tu‘i, ma sa ia faamatalaina e faapea e pei lava o Tua, le malosi tele o lana tu‘i. E telē foi lona tino, ma e mamafa foi, e lē tatau ona faatamala i ai.
O le isi vaega sa saunoa i ai Krushner, o le faamautuina lea o le isi taaloga a David Tua o le a sosoo ai nei. Sa faamautinoa mai e Krushner, le ioe o le alii o Monte Barrett e toe taaalo ma Tavita. O le alii tautaua o Evander Holyfeild le isi tagata sa ta‘ua lona igoa mo se taaloga ma Tavita.
Sa taua foi e Krushner o le tāua o Monte ona e lē gata o se tagata tatau ma e telē sona aogā mo Tua, ae o le toe faia ai o se la taaloga ina ia toe iloilo ai le mea moni e pei ona lē talitonu i ai le toatele o le lalolagi ina ua mae‘a le taaloga muamua.
O Iuni o le tausaga nei lava 2011, ua fuafuaina e tatau ona toe faia ai le taaloga lea a David Tua ma le alii o Monte Barrett. O loo iai foi le talitonuga o le a faia lava i Niu Sila lea taaloga, pe a talafeagai ma le tala i le seleni e pei ona saunoa i ai Krushner.
E lua lava fusuaga tetele o loo naunau i ai le alii o Cedric Krushner, o fusuaga foi ia o loo iai ma lona naunautaiga a mae‘a, o le a faigofie ai loa ona finauina se avanoa mo Toailetai i le suamupini o le lalolagi.
Ae o se maitau i ai i le taaloga a Tua na se‘i mavae atu, o se tasi lea o ana taaloga matagofie tele, ma sili atu ona manaia i le vaavaai ma le maitau i ai. E lē gata ina manaia lona faatinoina o le taaloga mai lava i le uluai taamilosaga seia oo ina mae‘a lelei.
Sa gaioi lava e lei mālōlō, sa vaaia le vave tele ma le saoasaoa o aao o le alii taaalo. E moni sa ese foi lagona sa iai, ma le naunautaiga i le ituaiga manumalo sa naunau i ai, peitai o se taaloga ua silafia ai e le toatele, le telē o se suiga ma le David Tua moni lava.
O le tele o taaloga e pupuu ma matautia le tulaga e vaaia, i le tu‘i oti ma le manumalo, peitai e lei mafai ai ona silafia isi mau gaioiga ma le moni ua toe foi lona malosi ina ua tuanai se faafitauli tele sa feagai ma ia.
O le a maua se isi feiloaiga lata mai ma Cedric Krushner, e uiga i le taaloga aupito mai a David Tua, pe a toe foi i Amerika e pei ona ia ta‘utino mai.
