Poo le a le lotu e te lotu ai, ia manatua e le aveane le tusi tulafono a le Ekalesia lena e te lotu ai e pupuni ai sau solitulafono i totonu o Niu Sila nei, e tusa poo oe o le faifeau, tiakono, poo le a lava le tofi o e uuina o le Lotu.
O tagata uma lava i totonu o Niu Sila, poo le a le lotu e te lotu ai, poo le a le tulaga e te uuina, e le aveane tulaga i totonu o le lotu e te pulea ai se aia tatau a se isi tagata, aemaise lava va o tagata i totonu o aulotu.
O le vaiaso a gafua nei o le a ou fesiligia ai i le fale faamasino High Court a Aukilani mataupu nei:
1. E iai se aia a se tagatalotu o uuina se tofi i totonu o le aulotu, poo le faifeau poo le failautusi poo le session clerk; i le tulafono, nate faasa ai se isi tagata lotu ona ulufale i le falesa e auai ai i se sauniga lotu?
2. E iai se aia i le tulafono i se faifeau pe soo se isi lava o le Ekalesia na te aveina ai se Tresspass Notice i lalo o le Tresspass Act a Niu Sila e faasa ai se isi tagata o le aulotu lava lea, i le sau i le lotu?
O lea ou te iloa le tali i le fesili lea e ta‘ua i luga, ona ua uma ona ou suesue i le tulafono i nei mataupu. Sa ou tu foi i ni faamasinoga a lotu i le High Court i Aukilani, ma le High Court i Wellington i ni faamasinoga i nei mataupu.
O lea ou te iloa le lē fia fai ma le lē taliaina e faamasino o se pule a se faifeau e tutuli ai tagata ma faasa tagata mai totonu o le falesa ma lotu.
E ui i lea, sa ou tusi i ni loia papalagi i ni mataupu o tulai mai i totonu o Ekalesia, lea ou te faia a latou galuega faaloia. Sa ou faamanatu i loia le latou tiute e ta‘u le tulafono i tagata o latou fautuaina, o falesa e le pulea e se toatasi. O falesa e le pulea e faifeau. Ae tusi mai i luga le loia papalagi pei e le manao e faatonu atu e le loia Samoa a latou galuega.
Ou te le popole ma ou fefe e fai le mea sa‘o. Ona e eseese mea a tutupu (facts), o lea ua ou toe saunia aloaia ai se tagi i le High Court, i se faaiuga a le High Court i lea lava mataupu, mo latou o loo ou tu ai.
Afai ae tali mai le High Court i le tali e pei o cases muamua i Aukilani ma Wellington lea ou te ta‘ua i luga, e iai foi le aia a le Ekalesia lea ua tigaina i ni mea sese, e faasaga e ave se tagi faasaga i le faifeau, ma sui uma taitasi o le Ekalesia, lea e solia aia tatau a tagata o le Ekalesia, ma faasasa ona o atu i lotu.
Sa ou tusi foi i leoleo, i luga o la‘u susuega i le tulafono, o Trespass Notices ia na ave e isi tagata lotu e faasa ai ona lolotu isi tagata o le Ekalesia lava e tasi, e le tatau ma soli i le tulafono ia Trespass Notices ia, ae fai atu ae le amanaia mai e leoleo le faamanatu i ai o le latou tiute i luga o le tulafono.
O le tasi lea mataupu o loo i luga o le lisi o mataupu lea o le a ave i luga o High Court ona e tatau lava ona fai le mea sa‘o ae aua le fefefe e fesiligia mea le sa‘o ma le solitulafono o fai pea, ae ufiufi.
O le tele o solitulafono e mafua mai lava i faifeau, ma tagata o uuina tofi i totonu o lotu. E foliga mai ua avea tofi ma mea ua le amanaia ai aia a tagata lotu.
O le tele o Ekalesia e tatau ona iai ni tulafono e faatapulaa ai tiute o le faifeau “Code of Ethics”. A iai se Code of Ethics ona iloa lea e tagata o le Ekalesia ia tiute e talia ma lē talia i totonu o le Ekalesia.
E mafai ai ona tou fesiligia mea sese e tutupu mai i totonu o le galuega a le Atua, ma faasinotonu i le faaupuga o le Code e lei faaaogaina e le faifeau, poo ua soli e le faifeau.
Poo ai e faia se mea e te iloa e le tatau ona fai ia te oe, aua e te fefe e fesiligia, pe sa‘o pe tatau i luga o le tulafono ona fai lea mea ia te oe.
Manatua o tagata ola uma e iai aia tatau e puipui i le tulafono.
E iai foi o tatou tiute e tatou te puipui aia tatau a isi tagata ola. Poo le a le maualuluga o tulaga ua uu e le tagata, e tutusa tagata uma i le tulafono a le malo, e tutusa tagata uma i le silafaga a le Atua.
