O le taaloga o le siisii uamea mamafa o loo faatulaga muamua mai i taaloga na aupito sili ona tele atu pine auro na maua mai ai i taaloga talu ai a le Pasefika. Peitai, e toatele o tagata Samoa e latou te lē o silafiaina le isi tala i tua atu o le faatinoina o le siisii uamea mamafa.

O le nofoaga poo le fale pumoomoo na tapena mai ai le ausiisii uamea mamafa a Samoa, e lē o atagia mai ai se tulaga lelei mo le soifua maloloina mo alo ma fanau o tausinio ai i lea foi taaloga. Na koleni ma togalauapi faatasi alii ma tamaitai siisii i totonu o le fale koleni i le ao ma le po a’o lumanai ai le taligāmalo a Samoa i taaloga lona 16 a le Pasefika.

Na maua se avanoa o le tatou nusipepa e fesiligia ai se tasi o tamaitai siisii uamea mamafa, lea ua avea nei ma faiaoga lagolago i le ‘au a le atunuu, le susuga ia Mary Opeloge, ma ia ta’ua ai, e matuā lē lelei lava mo le soifua maloloina lenei nofoaga, ona e faagasolo ai a latou koleniga i le aso atoa. 

A mae’a i le afiafi, ona toe tapena atoa lea o le nofoaga ma tafi i fafo le pefu, ae fofola ai a latou moega mo malologa o le po. 

O le tele o taimi o a latou toleniga e matuā pefu atoa totonu o lenei fale, ma e taumafai lava ina ia toe salu i fafo le pefu ma toe sii i autafa uamea koleni ae faaavanoa le vaega e momoe ai, o le itupa o alii e momoe i le isi itu o le fale koleni ae momoe le itupa o tamaitai i le isi itu.

Fale koleni a le au siisii uamea mamafa

E matuā lē tutusa lava le moe i le aiga moni ma le momoe ai i lenei nofoaga, ona o tulaga tau saogalemu aemaise lava mo latou o le itupa o tamaitai, peitai o le toatele o sui o le latou ausiisii, ua sili atu ia i latou le momoe ma tolauapi ai i lenei fale koleni ona e faigata foi pe a usu mai i o latou aiga ona o le tulaga manaomia tele o le seleni e pasese mai ai faatasi ai ma le tulituli mai o taimi mo toleniga.

Sa masani mai i le amataga e na’o le tasi lava le fale taele e gasolo uma i ai le itupa o alii ma tamaitai peitai o lea ua mae’a ona toe fausia le isi fale taele mo le itupa o tamaitai. E tasi le ulo e tunu ai le latou alaisa ae faatau ane eleni e faasoasoa i le tele o po. E iai le latou ta’inafi i fafo ane e masani ona gasese ai a latou meaai, ma o le tele lava o meaai e tausi ai le latou camp, e avatu uma mai i le Alii Faiaoga ia Tuaopepe Jerry Wallwork.

E leai se ogaumu, leai se masini ta lavalava, ae ta lava le tagamea a le tagata latou ia ma tautau i fafo i le la, e oo i ofuvae laiti o alii ma tamaitai. 

O tua ane o le fale koleni lenei e latalata i le aualatele, ma o se tasi lenei o faafitauli o feagai mo latou nei i le tele o po, ona e pei o le isi vaega lenei o le auala e fai ai patī ma pisapisao ai le toatele o tagata tafafao, o nisi ua laulauvavale ma faia ai nisi uiga matagā a’o momoe i latou i lenei nofoaga, ma e taumafai lava ina ia vave ona momoe ma aveese ma o latou mafaufau ina ia aua ne’i tulai mai ai ni vevesi.

Saunoa Opeloge, e leai se isi faiga e mafai ona faia i ai ona e na’o le pau lenei o le fale o loo faamatuu atu e le Malo ina ia faia ai a latou toleniga ma tapenaga mo tauvaga faavaomalo. E moni e laititi le avanoa o le fale, ae o loo taumafai lava le pulega o le siisii uamea mamafa ina ia faaaogā tatau ma faaaogā lelei ina ia mafai ona maua mai ai ni faamanuiaga lelei mo Samoa.

O le toatele o tagata o le atunuu, e latou te lē o silafia le tulaga pagatia ma le mafatia o tapena mai ai le latou ausiisii faatusa atu i nisi o autaaalo i totonu o Samoa, o loo api ma faigaluega ma taaalo ma koleni foi i ni fale koleni lelei ma le mautu, peitai o le Siisii Uamea Mamafa, e tele lava ona faatupe uma e le faiaoga ia Tuaopepe Jerry Wallwork faatasi ai ma le lagolago malosi mai a latou sponsors.