E foliga mai o lou toalua o se tagata e maopoopo lelei le faatulagaina o lona olaga.” E faasolo mai lava upu nei a le fafine pule, ae ua pei o le timuto loimata o Rosa.
Ua foi Rosa i lona fale ma mafaufau i le telē, le loloto, ma le mamao ua leva ona oo i ai le alofa o si ona toalua mo ia. Ua ia sii ae lana teu mo lea tausaga ma faatulaga i autafa o le ata o lana pele o Uatisone, lea o loo ataata mai pea ona foliga ia te ia i taimi uma e taulai atu i ai lana vaai.
O nisi taimi e alu ni itula o saofai le fafine i le nofoa sa masani ona saofai ai lona toalua, ona faasolosolo ai lava lea o ona mafaufauga i le la mafutaga, a o tilotilo atu i le ata o le tamaloa o Uatisone. E faaata e le fafine taimi faapea, e tele ina saofai si ona toalua i lona nofoa, ae sii ai o ia i luga ma fai a la tala o lena aso.
Ua faasolo le isi tausaga, ma ua atili faigata lava mo Rosa lona nofo toatasi e aunoa ma si ana manamea. Ua oo i lo la aso faaipoipo ma o taimi sili na ona mafatia ai le fafine, ae tuitui mai foi le faitotoa ma tu mai Sefo ma le isi teu rosa matagofie, ma le laupepa o upu alofa, “Maeu le suamalie o le alofa ia te oe! O lo ta alofa lea ua atili matagofie ai lenei olaga. O oe moni o le ava lelei e sili atu ona taugata nai lo penina. Manuia lo ta aso fiafia!”
E ui lava i se faanoanoa o le fafine i lona le toe mafai ona vaaitino pe talanoa atu i lona toalua, ae ua amata ona masani i le nofo na o ia, sei vagana i nisi taimi e alu ane ma talatalanoa lemu i le ata o le tamaloa, ona toe ata lea pe a mafaufau e le o lagona mai lava e Uatisone ana tala, ae ua lava ma totoe lea e faamalieina ai o ia, nai lo le toe talanoa atu fua i se isi tagata.
O le tausaga lona lima o le faamanatuina o le la faaipoipoga talu ona maliu le tamaloa, ae tuitui mai foi Sefo ma le teu rosa aulelei. Peitai nai lo le pipii mai o le laupepa i le lipine o le teu, o se teutusi lea ua taatia ese mai.
