Na fesili le fafine i le tama o Sefo poo ai na otaina le teu, ae tau ane, na ota lava e lona toalua o Uatisone a o lei maliu. “Talofa e, o ona uiga lava nei, e le taitai manao e tuai ma faaletonu se mea mo au,” o mafaufauga nei o le fafine a o faatulaga lana teu rosa i totonu o le fagu tuuteu. Ona toe faanoanoa lea o lona loto pe a mafaufau atu, ai nei o le taimi mulimuli lea o le a ia toe tofo ai i lenei tausiga faapitoa ma lauina nei alofaaga mafanafana.
Peitai, na sosoo mai le isi tausaga, o le mea lava e tasi, na toe tuitui atu foi Sefo e momoli atu le teu rosa faatasi ma le laupepa o upu nei, “Ua sili atu lou alofa ia te oe i lenei tausaga, nai lo le tausaga ua mavae.”
O le isi tausaga na sosoo ai, na aumai faatasi le teu rosa ma isi foi upu, “A o faasolo tausaga, o loo faapena foi ona faasolo pea le loloto o lou alofa mo oe lau Rosa e toatasi.”
Ua ofo le fafine i lenei mea, ma e lei iai sona mafaufau e fai e lona toalua se mea faapea, ae o lea ua agai i le tolu tausaga talu ona la valavala i le oti, ae o lenei lava e alu atu le tiliva a Sefo ma teu rosa i tausaga taitasi.
Ua mafaufau nei le fafine, sei alu lava i le fale faatau fugalaau, e faamautinoa pe o sao nei mea ina nei sese le faleoloa, ae pe o iai foi se isi tagata o ona faaseseina o ia. Ua amata foi ona tau masalosalo le fafine i si tama tiliva teu o Sefo, pe le o ia lea e fatu atu ona lagona i teu rosa.
“Faamolemole lava, e mafai ona ou vaai i tou faamaumauga i le suafa o le tagata o loo otaina atu le teu rosa mo Rosa Sitivisone?” Na tuu ane e le fafine e ana le fale faatau fugalaau le api ma na matua faateia Rosa ina ua vaai atu, o le saini lava a lona toalua lea e iai i ota uma o teu rosa mo tausaga taitasi, ma e le o iai foi se tausaga patino o faamuta mai ai.
“Ou te iloa ua faasolo i le tolu tausaga talu ona maliu si ou toalua,” o le amataga lea o tala a le fafine e ana le fale fugalaau.
“Na ou mautinoa e iai lava le aso e te fia silafia ai lenei mea. Ae silasila oe, ua leva ona tapenapena si ou toalua mo le taimi o le a ia tuua ai le lua mafutaga. Ua uma ona ia saini lelei lana ota ma sa ia totogia foi se tupe tele, ina ia mautinoa e tiliva atu lau teu rosa i tausaga uma, aua o lana tala, o le fugalaau lea e sili ona e fiafia i ai.
