E ta ane le 10 i taeao taitasi, ua lē nofonofoia le vaega o le Maketi i Fugalei i le otaota lafoai. O faleaiga, faleoloa ma le itu e faatau ai fua o faaeleeleaga ua tasi lava le nofoaga o le maketi ua lafoai ai le otaota, o le itu i tai o le nofoaga e faatali ai pasi ma taavale laiti a le lautele o le atunuu.
O le fuafuaga e pei ona ta‘ua e le aufaigaluega o Taui o Faalavelave Faafuasei (le ACC), lea e pulea le Maketi i Fugalei, ina ia tailua aso ma ao le otaota peitai o le faatuputupulaia o le numera o pisinisi i lea nofoaga ma le taulai uma mai i Fugalei o le mamalu o le atunuu auā faatauga, ua matuā faatuputupulaia ai foi ma le otaota ua ao mai i lea nofaoga i lea aso ma lea aso.
Ua atoa nei la le vaiaso talu ona suia le masani o le ao o otaota i le mae‘a o aso e lua ae o lea ua vaaia i aso uma alii e toalua ia ua galulue faakonekalate latou te faamamā lea nofoaga.
“O lea ua iloa e misi loa le ao o le lapisi, lē mafai loa ga koe magava se isi,” o le tali lea a se tasi o alii o loo feagai ma lenei galuega. Na fesiligia le totogi o loo maua ma na ta’ua ai e $380 i le lua vaiaso. O le popolega tele i lea nofoaga ona o le tulalata i nisi o faleoloa ma faleaiga aemaise o le tumutumu o le atunuu faatali pasi o loo mānava ai le otaota lafoai lenei.
O le faamatalaga a i latou o loo aoina le otaota, e faigata tele le galuega auā e tatau ona taamilo i faleaiga ma faleoloa poo poloka i totonu o le Maketi ma e tatau ona faafoi uma ane i le nofoaga ua sasaa i ai lea otaota. “Ua alofia ai foi ma matou pisinisi e le toatele o le aufaatau ona o le alu atu o le manogi i luma o ia faleoloa,” o se faamatalaga a se tasi o faipisinisi latalata ane i le faaputuga otaota.
“E fiu foi nai tama ia e feagai ma le faamamāina o le nofoaga lenei, e oo atu i le po ua matuā lē ofi lea nofoaga ma e lelea le tele o pepa nei i fale tuaoi ma tutuli ai le au faatau”.
E iai foi popolega i fanau ia e faatau a latou oloa i aoauli i le maketi ma ua tele ina faamautu ai i autafa o le lapisi – o le puipuiga mai i faamai e ono maua mai i le potopoto soo ai i lea nofoaga ua faamalosia ai e i latou ua faamamāina le otaota le tutuli ese o le fanau lenei pe a amata ona agai atu i le otaota.
Mo alii o loo feagai ma le otaota lenei i aso uma ua amata nei foi ona agai mai i aoauli, e siaki ma toe faamamā otaota e maua atu i lea nofoaga. “E sili ai le omai faalua i le aso e siaki auā e misi loa fola akoa le lapisi i le iku i kai o le Makeki,” o se faamatalaga lea a se tasi o le toalima ua faia lenei galuega.
