O se gaioiga e faaleaga i le Pule o le Tineimu

O masalosaloga nei o le Pule o le Tineimu ma Tali i Faalavelave Faafuasei, Seve Tony Hill ina ua laga le faatoesega a le TV ONE na faia i lenei vaiaso faasaga i le Afioga Seve ona o se lipoti a le Polokalame o le 30 Minute.
O le polokalame lea e afa itula e laga ai mataupu e tele lava ina le alu i Tala Fou, ma o se polokalame na amata i le tausaga e 2007, ma e faatautaia uma i le gagana Samoa.
O le faafitauli ua iai nisi o polokalame ua tauau lava ina ave i le Faamasinoga ona ua sao mai ai ma ni vaega e afaina ai le polokalame i tuua‘iga faia i afioaga ma nisi foi o tagata lautele.
O se alii e suafa ia Iosefo Lesa na galue i le tineimu na laga i le Polokalame lenei o le 30 Minute sona faagaulemalie tele ona ua ia tuua‘ia le alii Pule o le Tineimu i le faaoolima ia te ia.
Sa ia faamatala le mafuaaga o le faaoolima o le Pule ia te ia ona o lona faapalasi i lalo o le sima o le ofisa tutotonu i Apia, o se uta o tusi aoga na faatonuina o ia e ave i le taavale auā ua sauni Seve e malaga i Savaii, ma sa iai se fuafuaga e ave tusi nei mo aoga laiti i afioaga o Savaii na sasao ma sosolo ai le tele o mu i lea vaitau mugala o le tausaga.
O lana faatalatalanoaga la na faapea ai loa ona ta‘ua e lenei alii, ua alu ese ma le Tineimu ma ua faapea foi ona ave sana tagi faasaga i le alii Pule. O lea moliaga ua tolopo atu nei ia Ianuari o le tausaga fou e toe tolaulau ai.
E ui o lea ua taatia le tagi i le faamasinoga ae na faataga lava e le 30 Minute le fai i ai o manatu ma faaali ai le lē malie o lenei alii faigaluega.
O lea na faaauau ai lava ma le faatalatalanoaga, ma ua laga mai ai loa ma nisi o faafitauli na ta‘ua e lenei alii o loo tulai mai i totonu o le Matagaluega poo le Pulega lenei o Tineimu ma Tali i Faalavelave Faafuasei.
Faaalia e Seve, o le tele o nei lafoga e lē faavaea ma o mataupu ua afaina ai finagalo o lona aiga ma lana fanau ae maimau pe ana fai ua faamaonia.
O le faigata ona o lea ua faasalalau ae e manatu Seve e matuā afaina lava le TV ONE, pe a ia avea le mataupu lenei i le Faamasinoga.
O fautuaga i lea alii ina ia taofi se tagi ona e tele ai fua le taimi alu. O le faatoesega a le TV ONE na faasalalau i le polokalame o le LALI, sa faitauina i le Gagana Peretania, lea e manatu Seve sa tatau lava ona fai i le gagana Samoa, lea na faaleo uma ai faamatalaga ma lafoga faasaga ia te ia.
O le faatoesega a le Tamaitai Pule Sili o le Quality Broadcasting lea e ana le TV ONE, Galumalemana Faiesea Matafeo na ia ta‘ua ai, na ave lava le avanoa ia Seve Tony Hill e tali mai ai i tuua‘iga ma lafoga a Lesa peitai e lei avanoa atu mo lea tali.
O le valaau atu o le Leitio Polenisia na ta‘ua e Seve na agai ane ai loa ma iloa ai le faatalatalanoaga lava lea na fai i le televise ua fai foi i luga o le leitio, ma na faaalia e le alii Pule Sili o le Tineimu, o le tali na ave i ai e lē faavaea la faamatalaga ma e lei toe faaalu e le Leitio.
Peitai na ia ta‘ua o le lē avanoa mai mo le 30 Minute ona o lea sa i Savaii i le masina atoa o le taumafai e tineia le tele o mu ua sosolo i le Itu Asau, ma e masina atoa sa iai i lea itu o le motu tele i Salafai.
Na faaalia e le Ofisa Sili o le Tineimu, e faigata tele ona o le manatu i lana fanau ma lona aiga, ma sa tatau lava ona saili le 30 Minute i ni mau e faamaonia ai nei tuua‘iga.
“O le mafuaaga o lo‘u masalosalo o se gaioiga lava na faia e le alii faigaluega lenei e faaleaga ai a‘u, ona na mae‘a ona fai ana faasalalauga ae ua sauni e alu i le Quota i Niu Sila.
Ailoga foi e sau i le faamasinoga lea e faia ia Ianuari, i lana tagi lea ua fai ia te au,” o se saunoaga lea a Seve Tony Hill. “Ia ua e maua ni tagata e fai fai ni moliaga ona o ese lea ma le atunuu, e foliga mai na ala lava ona fai ina ia faaleaga lo‘u igoa pau lea”.
Faaalia e Seve o lea ua taatia le mataupu i le Faamasinoga ma e iai ana molimau i lea faamasinoga peitai ona pau lava lea o le itu na manao ai i le TV ONE ina ia fai se faatoesega auā ua salalau tala lē faamaonia faasaga ia te ia.
O lea la ua fai le faatoesega e ui o le gagana Peretania ua faia ai, ma ua fai i luga o le Lali ae ua lē faia i luga o le 30 Minute poo Tala Fou foi, ua manatu lenei alii ua lava ia lea.
“E leai so‘u taimi e toe laga ai lenei mataupu ona ua fautuaina a‘u e tele ai fua le isi faatiga ulu,” o se faamatalaga lea a le alii Ofisa Sili.
“Ou te lē manao foi a‘u e fai se gaioiga e uma ane ai ua tapuni le TV o lea e fia matamata TV tagata Samoa”.