O se faamanuiaga le iai o se tamā lelei

E ui lava sa ou iloa ua tele ina faataotolia si ou tama i lona gasegase o le suka, ae sa mamao lava ma ou mafaufauga o le a vave ona motusia le ma mafutaga i lea taimi na moe filemu ai. O le aso muamua lava o le masina o Me, o le masina tonu foi lea o lou aso fanau, ae o lenei ua ou toe faamanatu mai ia te au i le pau i ai o le aso na muta ai lou toe talanoa atu i si ou tama.
O se tama, e ono mate gata e tagata ona uiga faaalia ia te au, aua e le mafai ona ou lagona i soo se taimi e talanoa ai lou tama ma nisi tagata e uiga ia te au poo isi uma foi ana fanau, e te lagona atu ai se talanoa faaviivii pe fia faailoa ni mea ua ausia e nisi o lana fanau. Ou te manatua lava i soo se taimi e faamalo ane ai se tasi o le matou ekalesia i lou tama poo laua uma ma lou tina, e uiga i se tasi o matou aemaise lava au, i ni tofiga iloga sa ou maua i totonu o le matou ekalesia, ma ina ua faamanuiaina foi au aoaoga, e tasi lava le tali masani a lou tama, ‘talosia ia alualu ai pea lea lelei, ma ia maua ai se viiga o le Atua.’
E na o au lona afafine, ma o le itu e malie ai, o le toatele o au uo i le aoga e faapea mai, ‘amuia oe e le fasia e ou matua’. Ou te le iloa poo fea e sau ai lo latou talitonuga lena, atonu ona o le manatu e na o au le tama teine, ma e latou te vaai foi i le auala e tausi faaletino ai au e ou matua. Peitai, e matua i sese i sini lena lafoga, aua e tusa lava pe na o au le teine, e lei foi ai lava le fusipau a lou tama i lou pau pe a oo foi ina ‘tumu lau fua’ e pei ona fai mai soo ai.
O fasi na e tiga i lou pau, ae suamalie i ooooga o lou agaga, ma e momoligofie ai i ou faalogona, le alofa faamaoni ma le faapelepele o ou matua ia te au, aua o na taimi uma e sasa ai au, e le taitai ona tau lou mafaufau faapea ua saua pe sasa i se le alofa. Na pau le itu e tu mai lou mafaufau, o le sasa ina ia faasao ai le mea sese ua ou fai, lona uiga, ua moni le upu a le Tusi Paia, o le sasa e aoai, ma o le mea na ou lulu ua ou toe selesele, ma e vave ona ou toe fetuunai ai ma toe faaleleia se mea sese sa ou faia.
E tele ma talanoaga ma si ou tama e fai soo, o nisi o na talanoaga e faaiu lelei ma fiafia, ae o nisi foi talanoaga ua faaiu puta ma toetoe ai foi ma feiloai ma lou fili tupito o le fusipau. Peitai ina ua ou matua ma ua oo i le taimi ou te tuua ai lou aiga ma ou matua mo lau tautoga e auauna mo lau ekalesia, sa ou iloa le faigata mo si ou tama ona talia lea faaiuga. E le faapea ua toe sui le mafaufau o lou tama i lana folafolaga ia tuu atu au e avea ma ana taulaga ola i le ekalesia, peitai sa manao ia ou nofo lava i lo matou fale ma ou tausavali i lau galuega.
Mulimuli ane, i le tele o ni fautuaga na faifai malie i ai e si ou tina, ona maluelue ai lea o le toeaina ou te nofo ese atu. Ou te manatua e toetoe o aso uma, e vili atu ou matua e asi atu au ma faamautinoa o loo lelei mea uma i lau nofo ai i totonu o le lotoa o le matou ekalesia ua ou galue ai. Ina nei matau sese mai e nisi lau faamatalaga, ae o le mea moni lenei, e matilatila ese lava au i le tele o nai isi uso ma tuagane talavou sa matou galulue ma nonofo faatasi. E alu ni aso faatoa vaaia ni o latou aiga ua agai atu e asiasi pe o foi i tua i o latou aiga. Peitai, ua fai ma mea tauloto a lo matou nofoaga, le afeafe atu o le taavale a nai ou matua, i Aso Toonai uma, e momoli atu se faatauga o mea uma ou te moomia.
Na faasolosolo pea le malosi o si ou tama, ua foliga ua faatetele lona aafiga i le gasegase suka na maua ai. O aso uma ma te talanoa ai i le telefoni pe ou te alu ifo i lo matou aiga, ua ou lagona le talanoa a se tama, ua ia faasaunia lana fanau mo ni aso e ono valavala ai. Sa ou lagona le faanoanoa, ae sa ou faalogologo ma le totoa, ma i lou loto sa ou tatalo le leoa i lou Atua, sei alofa foai mai pea se malosi i si ou tama, ia tau faaumiumi ai se ma mafutaga.
Ona manao lea o lou tama e fia talanoa toalua mai ma lou tina ia te au i se tasi o aso. Sa ou popole ma tatavale lou loto pe iai foi se mea o le fiafia ai ia te au. O lea talanoaga, na ou tagi lotulotu ai, ona ua talanoa mai lou tama, i le itu ia ou faaeteete ma manatunatu mamafa i se taimi o le a fai ai sau filifiliga mo se tasi o le a ma mafuta i le olaga atoa. Na tutulu si ou tama a o fai mai ana upu, aua o le toeaina, ona pau lea o le mea e inaina ai tele, pe a ia vaaia ua umi ona ma tutu talanoa ma se tama.
E le o se mataupu e fai soo i ai ni a ma talanoaga, ae sa tele ina talanoa lou tama i lou tina i ona faalogona uma i lea itu mo au. Na faapea mai lou tina i se tasi o aso, ‘E manao si ou tama, ia e nofo i se palagi, ona e le manao e te iu i se olaga pologa e pei ona iai le tele o isi tama teine, leaga e le talafeagai le avatu o lana purinisese e fai ma tavini a se isi aiga. Na fai mai foi lou tina, e le fiafia Tama pe a ou nofo i se aiga e latou te tau au o se ‘fafine nofotane’, peitai o le tau lava lea faasamoa e le mafai ona alo ese ai, lea la e manao ai e sili ona ou nofo i se palagi, aua e tutusa uma lava tagata.’
Ae o le isi foi aso a o ma talanoa ma si ou tina, ae ua toe ata foi ma faapea mai, ‘e ese lava lenei toeaina, ua toe fai mai foi, e le manao e nofo si ona afafine i se papalagi, nei alu lena palagi i sona atunuu ma avatu mamao ai, ae seasea ona la toe feiloai. Toe ua mafaufau foi si ou tama, e leaga foi lou faaipoipo i se palagi leaga o ia e le iloa nanu, ona le mafai ai lea ona mafana se la mafutaga ma se tasi o le a tuu atu i ai lana avega o le tausiga o lona afafine, ae sili ai pea se tama Samoa, ae ia faamautinoa o se tama e alofa moni ma tausi lelei i lona afafine.
O uiga nei o lou tama ua ou toe saafi i ai, maimau e, pe ana o soifua mai pea, sei ou momoli faafia i ai lau faafetai i lana tausiga faamaoni sa matua atoatoa ona faatino, lenei ua ou ola fiafia ai. Ae ou te mautinoa, o se fiafiaga sili lea mo lou tama, ona e ui lava ua ma valavala nei, ae ou te mautinoa, sa faamalieina o ia ina ua taulau lelei ona moomooga mo au, ua ia ioeina le talafeagai o lau filifiliga i le ma te faatasi, e ese mai si ou tama ma lana tausiga.
O le aso na maliu filemu ai si ou tama, e lei vave ona ou tagi, e ui ina matua ou lagona le faanoanoa ina ua ou le maua ane ona toe taimi, ae sa toafilemu lou mafaufau ma ou faafetai ae i lou Atua, ona sa faamanuiaina lou olaga i le ola mai se tama alofa. Ai lava o ma toe talanoaga fiafia ia ma le tama e pele ia te au, aua na ma talanoa ma talie fiafia i lea lava aso a o ma asiasi atu ma lou toalua e faatalofa i matua ma le aiga, ae afiafi ai loa moe filemu si ou tama, ma to ai lava lana manava.
E oo mai lava i le asō, e pei o se ata faasolo pea i aso uma lou olaga mai le tausiga a ou matua aemaise si ou tama, ma e ui na ou misia lana faatofa, ae faamafanafanaina au i le iloa, sa faamalieina lou tama i le maua lava mafutaga, o se tama i lona afafine. Ma ou te faatalitali i le aso, le aso sili lea o loo faatalia uma e le au Kerisiano, ou te toe faafeiloai atu ai i lou tama a o toe tu mai, ma toe momoli faafia i ai lau faafetai, ma sei faaleo i ai lau tautinoga, ‘Tamā, o oe o se faamanuiaga moni mai le Atua mo au.’