O lea ua faailoa lautele nei le taunuuga o se sailiiliga sa faia i atunuu uma o le lalolagi ma ua faaalia ai o atunuu e lima pito i luga o loo aofia ai Samoa i le maualuga ai o le numera o tagata ua aafia i le tino puputa.
E lē o manino i le sailiiliga lenei poo Samoa Tutoatasi poo Amerika Samoa o loo aofia faatasi i le taunuuga o ia sailiiliga. Pau le itu tāua o loo faailoa mai i le suesuega lenei o atunuu lava ia o le Pasefika ua matuā aafia lava i le tino puputa o tagata e mafua i suiga o le soifuaga e faasino i taumafa ua soona taumamafa ai ae o meaai e tele ai le ga‘o, suka ma le masima faapea le taumafa tele i meaai e tele ai le masoā.
O Tonga o loo numera tasi, pito i ai Samoa, sosoo ane ai ma Kilipati, o le atu Malesala, ma le atu Maikoronesia. Ua faailoa foi i lea sailiiliga e tusa o le tasi vaetolu o le faitau aofai o tagata o le lalolagi poo se fuainumera e tusa ma le lua piliona ua aafia i le tino puta. O se taunuuga ua avea ma atugaluga i atunuu o loo vaivai tamaoaiga ma atunuu tauatiae ona e fesootai lenei tulaga i faama‘i lē pipisi ua taatele nei e pei o le suka, toto maualuga, gasegase o le fatu, ma aafiaga o fatuga‘o ma ua lamatia ai ma tupe maua ona o le tele o seleni e faaalu i togafitiga o nei gasegase.
