“E sau a le papalagi vivini i Samoa ma faaleaga galuega o fai ae e fesoasoani i ai isi tagata Samoa ma fiafia ai i faiga taufaaleaga o Samoa ia e fai e le alii lenei”…Tuilaepa
O le manatu lea o le Palemia ina ua toe lāgā foi le mataupu ia John Campbell i lenei vaiaso.
O le faamatalaga a le Susuga Tuilaepa Lupesoliai Sailele Malielegaoi, o le finauga lava lenei e lē mafai lava ona taofia seiloga a e sau John Campbell i Samoa e la te o lelei i nofoaga ia ua fai ai le galuega toe faalelei o le sunami.
Faaalia e le Alii Palemia o latou na talosagaina se faatalatalanoaga, ma e lē mafai ona faia i Niu Sila se faatalatalanoaga ona o Samoa lea e afua atu ai ana suesuega ma ana tuuaiga, ma e tatau la ona fai i Samoa lea feiloaiga.
“Leaga o tagata nei e tatau lava ona vaai faato‘ā talitonu i galuega ia ua fai, e moomia le faasino i ai o galuega ua alu i ai le tupe.
E pei o Toma, ai e sau le alii lea i le gafa o Toma seiloga lava e vaai faato‘ā talitonu,” o le saunoaga lea a le Alii Palemia.
“E lē aoga i tama ia faamatalaga ae e aogā lava le agai sa‘o a i afioaga, faasino i ai auala ua fausia, faasino i ai taligalu, faasino i ai fale, laina eletise ma paipa ua faatatitia o suavai, faasino i ai le anoano o fale uamaea ona fausia ma isi mau galuega ia e faagasolo le fausia ona faato‘ā talitonu lea”.
Faaalia e le alii Palemia lona faanoanoa ona o le auala e faia ai e le Alii tusitala lenei ana faalauiloa ma o tagata lava o Samoa ia e agai atu foi ma fesoasoani ia Campbell i le faiga o lipoti taufaaleaga ia Samoa ma le galuega o loo taumafai nei e faamae‘a.
“E sau lava le papalagi vivini i Samoa ma faaleaga galuega o fai ae e fesoasoani i ai isi tagata Samoa ma fiafia ai i faiga taufaaleaga o Samoa ia e fai e le alii lenei,” o le manatu lea ua faaali e le Alii Palemia i le faaauau ai ona lagalagā pea lenei mataupu.
O le tele lava o mataupu ua lāgā i lenei vaitaimi ua faatatau ia Campbell ma le alii Palemia ma ua oo lava i le faatalatalanoaga a le Ofisa Sili o le SUNGO le Susuga Roina Faatauvaa Vavatau, ia Campbell ua fesootai e le toatele e aofia ai le Komiti Faatonu o le SUNGO o le mafuaaga lea ua faapea ai ona fautuaina e le Palemia le o ese o le SUNGO mai i lo latou ofisa i Motootua.
O le faamatalaga a le taitai o le Malo, e mafua le fautuaga ona o lea ua iai isi faalapotopotoga ua manaomia lea nofoaga ae ua iai tupe a le SUNGO e mafai ai ona faatau so latou fanua ma se fale e faamautu i ai a latou galuega fai. Na ia faafetaia foi le galuega faifai pea a le SUNGO ma ia faapea mai ua tele galuega lelei ua fai.
O le faamatalaga a le Faamalu o Faalapotopotoga Tumaoti ua vaavaai nei se nofoaga e see i ai.
O le faamatalaga foi a le Malo e lē mafai ona toe fulitua i le taimi ua tuu atu e o ese ai le SUNGO le aso mulimuli o le masina nei.
O lea foi ua tali atu le Alii Palemia i le lagolago a le alii faipule tutoatasi le Afioga Levaopolo Talatonu i le lipoti lava lea ma faapea mai ai, o loo sa‘o lava le suesuega o loo faatautaia ma lipoti faalauiloa a le alii tusitala o Niu Sila, ma o loo fesiligia foi e lona sui le maioio lelei mai o se faamalamalamaga a le Malo e faatatau i le faaaogāina o le tupe o le sunami.
O le tali a le alii Palemia e fou nei lava le sui faipule o le afioga Levaopolo ma ua tutusa lava ia ma i latou ia sa fesoasoani ia Campbell ma feoai solo e sue ia ona o le faia o faamatalaga ua lē amanaia ai le galuega tele o loo feagai nei ma le Malo i le toe faaleleia ma le toe fausia o nofoaga ua leaga ona o le sunami.
O loo faatali pea la le Palemia pe toe sau Campbell pe leai, ae o lea foi ua oo mai se isi tusi mai i le vaega o loo nafa ma le polokalame a lea alii tusitala e faapea mai, ua mae‘a le vaitau e faaali ai le polokalame, ua mālōlō mo le faaiuga o le tausaga, ma faato‘ā mafai ona faaauau pe a toe a‘e mai i le tausaga fou.
