Ua sauni atu nei le alo lauiloa o Samoa i Ausetalia, le alii o Alex Leapai poo LIONHEART e pei ona lauiloa ai, i le taaloga i Jakarta i Indonesia e pei ona tuua ai Brisbane i le Aso Gafua, aso 11 o Aperila 2011.
O le a fetaui ai ma le alii o Okhello Peter mai Uganda Aferika, ma o le a faataunuuina le la fusuaga i le aso 17 o Aperila 2011.
Sa malaga faatasi le susuga ia Alex ma si ona tuaa na malaga mai lava i Samoa, le tofa ia Faatau‘i Leapai faapea le aumalga a le LIONHEART auā le tapuaia o le taaloga.
O le a galue malosi le susuga ia Alex e sauni atu mo le puipuiga o lana fusi o loo iai o le paga mamafa a Ausetalia, lea o loo ia umiaina i le taimi nei, WBO Oriental faapea foi le alii o Okhello Peter mo le puipuiga o lana ia foi fusi o le WBO o le paga mamafa a Aferika.
Okhello Peter (Uganda) 20 manumalo mai le KO’s & 3 faiaina, 1 o se tasi mai le paga mamafa a le lalolagi.
Nofoaga: Jakarta International Expo
i Jakarta Indonesia
Aso: Aperila 17, 2011
Fusi: WBO Oriental & WBO Africa
heavyweight
E pei ona talosagaina e lenei foi alo saili malo o Samoa o loo siamupini i Ausetalia i lea fusi, “Samoa e, ou te lē mafaia se mea pe a aunoa ma a outou talosaga.
E manuia foi faiva e tapuaia.” Tau ina ia faaopoopoina pea e le Atua le malosi o le susuga ia Alex ina ia tini ai pea lona faamoemoe i le manuia.
