O le Aso Lua, 8 o Fepuari e toe amata ai fonotaga a le Palemene mo le tausaga 2011.
O lea ua faamanino mai e le faigamalo le aso e fai ai le faigapalota faalauaitele a Niu Sila, o le Aso Toonai, 26 o Novema 2011.
Ua tatau nei ona tatou tapena sauni mo lea aso. E tāua le faamuamua o le resitala o latou uma ua atoa le 18 tausaga, ma ua nofomau i Niu Sila, ina ia mafai ona palota i lea aso.
Ou te talitonu afai lava e finagalo i ai o tatou tagata, ma tutu malolosi e palota i le aso 26 o Novema, o le a faapena ona manumalo le vaega e mafuli i ai le lagolago a o tatou tagata.
Sa ou vaaia le malosi o le palota a o tatou tagata i le faigapalota o le tausaga 2005 lea na manumalo ai le vaega faaupufai a le Leipa talu ai le malosi o le palota mai itumalo o Magele, Manukau East, Manurewa, Maugakiekie, Mt Roskill, Mt Albert, ma isi itumalo i Niu Sila o loo afifio ai le mamalu o le tatou atunuu.
Sa faapena foi ona ou vaaia le malosi o le palota a o tatou tagata lea na manumalo ai Len Brown i faigapalota o le SuperCity i Aukilani i le tausaga ua tea.
Ou te matuā talitonu foi, afai e tutu malosi lo tatou atunuu e palota i faigapalota a Niu Sila i le aso 26 o Novema 2011, o le a faapena foi ona iai le suiga i le faigamalo.
E mafua ona ou talanoa atu faapea, ona ou te matuā talitonu ua toatele naua aiga Samoa ma aiga Pasefika o loo oi ma pologa talu ai le faaletonu o le tau o le soifuaga ua iai nei talu ona tulai mai le faigamalo a le National.
E ui lava i sou taofi, ae o le fesili e tatau lava ona tatou fesili ai o tatou aiga a o tatou faagasolo atu tapenapenaga mo lea faamoemoe: O manuia oe ma lou aiga i faiga a le National o loo fai nei, pe a faatusatusa i le taimi a o avea le Leipa ma faigamalo?
O ai na faia le siitaga o le GST mai le 12.5% seia oo i le 15%, lea ua siitia ai le tau o le tele o oloa ma mea taumafa e pei ona iai nei? O le tali o le National!
A o lea foi ua faaataata mai e se tasi o komiti a le faigamalo sa iloiloiga lafoga faapea ua tatau ona toe sii le GST i le 17.5%.
O ai na mafua ai ona siitia le tau o penisini o taavale lea na siitia mai i le $1.50 poo le $1.60 i le lita seia oo i le tau lea ua iai nei penisini taavale o le $1.80 i le lita? O le tali o le faigamalo a le National!
O ai na mafua ai ona siitia le tau o le moli eletise ua iai nei? O le tali o le faigamalo a John Key.
Ma o loo fuafua foi e le National ina ia faatau ese ia kamupani moli eletise.
Afai e taunuu lea faamoemoe o le a faapena ona toe iai isi siitaga o le moli eletise.
E lē gata i lea o tupe faasili uma a ia kamupani o le a maua e le au mauoa.
O ai ua mafua ai siitaga o le a totogi e mātua mo le faaaooga o o latou alo ma fanau i aoga faataitai? O le tali o le National!
O ai ua mafua ai siitaga ua totogi e le toatele o tagata e vaaia fomai? O
le tali o le faigamalo a le National!
O ai ua mafua ai fesuiaiga ua iai nei penefiti mo tagata e leai ni galuega, penefiti mo aiga e matua tasi, penefiti mo tagata e maua i ma‘i o le tino, ma o ia fesuiaiga ua taofi ai penefiti a isi? O le tali o le faigamalo a John Key ma lana vaega!
O ai ua mafua ai ona faafaigofie i pule o kamupani ona faatea tagata faigaluega e aunoa ma ni mafuaaga tatau? O le tali o le faigamalo a le National ma le latou vaega!
O ai na mafua ai ona maua fesuiaiga o lafoga totogi lea na maua ai e latou uma o loo totogi i le $100,000 i le tausaga le maualuga o ia faamanuiaga? O le tali o John Key ma lana vaega.
O ia fesuiaga o loo maua ai e le 600 o tagata Niu Sila o loo maua le $1 miliona i le tausaga le isi $1000 faaopoopo i latou tupe maua i le vaiaso.
A o le toatele o le atunuu o loo maua na o le $40,000 i le tausaga, na o le $10 – $30 latou tupe faaopoopo na maua i le vaiaso, ae e lē taitai tutusa ma le siitaga o le GST, penisini taavale, ma le siitaga o le moli eletise.
O le mea lea ua tupu i Niu Sila, ua alu i luga tau o le soifuaaga ae o loo tumau pea totogi a le toatele o tagata faigaluega i se tulaga maualalo, ma ua lē gafataulimaina i totogi a le toatele o le aufaigaluega ona tausi o latou aiga.
O le isi itu pito i sili ona faaletonu, o lenei o loo siisiitia pea le maualuga o le fuainumera o latou ua leai ni galuega. O lea lava o loo i luga i le 158,000 le maualuga o le fuainumera o latou e leai ni galuega.
Afai e tumau pea lea fuainumera i le maualuga o loo iai nei, o le a faapena foi ona tumau ai lava totogi a le aufaigaluega i se tulaga maualalo, aemaise le totogi maualalo faaletulafono poo le minimum wage lea o loo tumau pea i le $12.75 i le itula.
O le fesili e tatau ona fesili ai lava le tagata ia te ia lava, O manuia oe ma lou aiga i faiga a le National o loo fai nei, pe a faatusatusa i le taimi a o avea le Leipa ma faigamalo?
E tāua tele lau tali e fua i ai lau palota i le aso 26 o Novema 2011.
Soifua
