O lou taimi lenei Talavou

Ua amata lenei tausaga ma ua tele ina amata galuega fai, e pei ona masani ai i tausaga taitasi. E le gata i faalapotopotoga, Ekalesia, Mafutaga faaautalavou ma soo se vaega o loo ua tomatauina ai le finagalo o le Atua i totonu o Aotearoa nei.
O le naunautaiga foi lenei o le mafutaga faaautalavou, ina ia atinae se mafutaga auā le aoaoina ma le tuufaatasia o le tupulaga, ina ia avea ma ni talavou e tulai mai e faia le finagalo o le Atua mo le lumanai.
E pei ona iai le tatala aloaiaina, mo le taimi muamua o le mafutaga a le autalavou a le Ekalesia Worship Centre Church i Onehunga, lalo o le vaaiga Pastor Masi ma le faletua ia Etevise.
O le po o le Aso Faraile o le faaiuga o le vaiaso ua tuanai, na faataunuuina ai lenei faamoemoe. Pei ona silafia, o lenei lālā faatoā, tatalaina ia Aukuso o le 2009, peitai ua amata faagasolo nei polokalame mo le taimi muamua a lenei Ekalesia.
E ui o se tuufaatasiga o le polokalame a le autalavou mo le taimi muamua, peitai na maeu le tali atu o aiga, uo ma e masani aemaise o le lagolagosua a le mamalu o le aofia faapea le autalavou na faatasi atu i lea faamoemoe.
O nisi vaega o le polokalame, o le faatinoina o siva faaleagaga, pesepesega ma tala faatino, o se sao foi lea mai le autalavou a le Ekalesia Worship Centre mai Manukau, susuga le Faafeagaiga Leota ma le faletua ia Norma, faapea itema na saunia faapitoa e le aoga Aso Sa Onehunga, ua maualuga ai le viiga o le Atua i tapenaga a autalavou i lea po.
Na taualuga itema uma, i le itema faapitoa o le afiafi, o le laugaina lea o le upu folafola a le Atua, na laugaina lava e le susuga i le faafeagaiga Onehunga, Pastor Masi ma faamaea ai lenei faatasiga, i se taumafataga māmā i lea afiafi.
Ua tatalaina ai nei lenei mafutaga autalavou, ma o le a faia lava pea ma faaauauina lenei mafutaga i Fergusson Domain Hall, 56 Waitangi Road, Onehunga i Aso Faraile o vaiaso taitasi.