(Ignorance of the Law is No Excuse)
Ona o lenei foi ua amata le tausaga fou, e faamanatu atu ai le faaupuga faaletulafono lea e tusia i luga.
A e solia se tulafono, e le avea lou lē malamalama i le tulafono, e sefe ai oe mai se moliaga ma se faasalaga matuia e oo lava i le falepuipui. “Ignorance of the law is no excuse”. “O lou lē malamalama i le tulafono e lē avea ma lafitaga”.
O le tele o o tatou tagata e muamua saini feagaiga faaletulafono ae lē faitauina upu tusia i luga o pepa e sainia, ina ia malamalama lelei i ai i ni tulaga o faatapulaaina i le tulafono e tatau ona nofouta i ai, ma muamua ona fuafua pe gafatia ni tupe totogi o loo tusia i pepa ia e i ou luma e saini, a o e lei sainia.
E fuafua i luma fuafua i tua, ma saili se fesoasoani e faamalamalama atu ni upu faaletulafono o i luga o le pepa, e te lē malamalama ai a o e lei sainia.
O le toatele foi e latou te tusi tala lē sa‘o ona saini lea ma le manatu e faapea, e lē taitai ona mauaina i latou i se taimi o i luma! Afai e te lē malamalama i le faaperetania, aua e te matamuli e talosaga i le tagata lea e tuuina atu ia te oe le pepa e saini, ina ia tuu atu se avanoa ia te oe e te aveina ai le pepa lea e tuu atu e te sainia, i se isi tagata na te faamalamalama atu ia te oe upu ia e tusia i luga o le pepa, a o e lei sainia.
E pei ona ta‘ua i luga, e lē avea lou lē malamalama i le tulafono, e fai ma ou lafitaga mai moliaga ma sou faasalaga i luga o le tulafono.
O NI MATAUPU NEI O LOO TULAI MAI UA LAGA AI LENEI MATAUPU:
E tasi se upu faaperetania o lenei ua aafia tele ai nisi aiga i luga o tulafono ia e faaaogā mo tagata o loo nonofo i fale o le malo WINZ.
O le upu faaperetania lea o le “Deliberate”. (“e fai ma le iloa”) i tuuaiga a le malo o Niu Sila, e faasino i tagata o loo nonofo i fale o le malo e faapea:
I lalo o le tulafono of Housing Restructing and Tenancy Matters Act 1992, o rent sa totogi e tagata i le malo, sa fuafua e le malo i luga o totogi o tagata o loo nonofo totogi i fale o le malo.
Ina ia iloa tonu e le malo le tupe e tatau ona totogi e tagata o loo faaaogāina fale o le malo, e faamoemoe le malo i le faamaoni ma le sa‘o o faamatalaga o loo tusitusi atu i le malo e tagata o loo nonofo i fale o le malo, e uiga i le tupemaua a le aiga (household income) ma ni tulaga o le aiga e tatau ona vaai i ai le malo, ona fuafua lea o le totogi o le fale e tatau ona tāpā le aiga e totogi.
E iai tagata ua maua e le malo, o le tele o tausaga, o upu na tusitusi mai i pepa ia e ave i le malo ma ua uma ona saini, o lenei ua maua e le malo o mea pepelo ma lē sa‘o.
O ē o afaina i nei mataupu o lenei ua lē gata ina faatonu e le malo e toe totogi atu tupe a le malo sa tatau ona totogi pe ana charge tonu le rent sa‘o, ae o lenei ua molia i luga o le tulafono i moliaga matuia e ta‘i 7 tausaga e falepuipui ai pe a faamaonia i le tulafono nei moliaga.
E pei ona ta‘ua i luga, e toatele lava o lenei e fai mai i le loia, ua ala ona soli le tulafono ma saini pepa o tusia ai talapepelo, ona e lē malamalama i le tulafono.
E leai se tiute lautele o se loia e fai fua ai ni galuega faaloia, ona o le tagi mai na ala ona fai ma saini pepelo pepa ona o le lē malamalama.
E leai foi se lafitaga e te ‘alo ai ma le falepuipui pe a faamaonia e le malo o Niu Sila pepa na e sainia, o loo iai tusitusiaga lē sa‘o.
E sili le puipuia i lo le togafitia.