O loo manaomia e le pulega o Manukau City Council finagalo o tagata lautele e faatatau i mea e tatau ona faia mo le faaleleia atili o le taulaga o Magele poo le Mangere Town Centre, ma o loo amata i le aso 27 o Oketopa ma faasolo ai seia oo i le aso 23 o Novema le avanoa e faaalia ai sou finagalo poo talafeagai pe leai, le taulaga ma atinae o loo iai i le taulaga tutotonu o Magele.
E te maua mai nisi faamatalaga i soo se faletusi a le Mangere Town Centre, Mangere Bridge Library, poo le Mangere East Library.
Soo se faalapotopotoga tumaoti, poo se ekalesia, pisinisi, aoga, autalavou, poo se tagata e toatasi, e iai sona finagalo e fia faaalia i faaletonu, poo mea e fia faaleleia ai le Mangere Town Centre, o lou avanoa tonu lea e faaalia ai i le pulega o le Manukau City Council.
Afai foi e fia malamalama atili la outou pisinisi, ekalesia, aoga, poo soo se faalapotopotoga tumaoti i fuafuaga ua faataatia mo le lumanai o le pulega a Manukau, o loo maua lo outou avanoa e talosagaina ai se faamalamalamaga mai nisi o le aufaigaluega a Manukau.
E taua tele le faafesootai o le pule o mataupu tau tamaoaiga a Manukau, le susuga ia Filemoni Timoteo mo se avanoa. Faafesootai Filemoni i le telefoni (09) 262 5111 ma talanoa mo so outou avanoa.
O le taua o lenei avanoa, e mafai ai ona iai so outou sao a o lei tamauina fuafuaga faataatia fuafua mamao mo le taulaga tutotonu o Magele mo le isi 50 tausaga o i le lumanai.
E manaomia ni sao o loo vaai mamao i le tuputupu ae o Magele mo le agai i le lumanai. O le a sa outou vaai i le taulaga o Magele, pe a faatusatusa ma isi taulaga poo aai? Afai e auleaga foliga o lenei taulaga, o le a se mea e tatau ona fai ina ia faaaulelei ai ma matagofie le taulaga?
O talafeagai faleoloa o loo iai nei? O a nisi faleoloa poo pisinisi e tatau ona iai? O a pisinisi e le tatau ona iai i le ‘shopping centre’?
O talafeagai le swimming pool, ma le gymnasium o loo iai nei, pe e tatau ona toe suia? O talafeagai le fuainumera o fomai o loo faatino a latou auaunaga i le Mangere Town Centre?
O talafeagai le faatulagaina o auala savali ma auala taavale o loo fuafuaina mo feuiaiga i le va o nofoaga lautele ma faleoloa o le taulaga a Magele?
Faapefea paka o taaloga o loo siosiomiaina le taulaga? O lelei atoatoa le faaaogaina o ia paka, poo iai se isi auala e mafai ai ona atili faaleleia le faaaogaina mo taaloga ma isi taaloga?
O le isi foi fesili taua, poo e fiafia i le faatulagaina o le maketi i Aso Toonai i Magele, pe e tatau ona faatulaga i se isi mea?
O le a foi sou finagalo i Ofisa a le Malo o loo iai nei, poo lelei le tulaga o iai, pe leai? Afai e leai, o fea se tulaga e tatau ona iai, ina ia faigofie ona agai i ai tagata?
Ou te fia iloa foi sou finagalo pe talafeagai le iai o se Ofisa a le Leipa i le Mangere Town Centre pe leai? O fea se tulaga ua outou silafia e faigofie i tagata lautele o Magele ona agai atu i ai?
O le taua o sou sao i lenei galuega, ina ia mafai ai ona faataatia lelei fuafuaga mo le lumanai, ma ofi ai sou sao i mea e tatau ona faatino mo le faaleleia atili o le tatou aai lenei o Magele.
Afai e te augata e faaalia sou finagalo o le a faapena foi ona le amanaia sou taofi i lenei galuega, ma mulimuli ane ua faia ai faaiuga e tagata ese ma atonu e te toe mulimuli faapea ua sese ia faaiuga, ae ua uma le taimi, ua leai sou avanoa.
A o le isi vaega e sili ona taua, afai o oe o le tagata o loo aumau i Magele, o oe foi e totogiina le tupe o loo fuafua e faaaoga mo lenei galuega. Ona e fesili lea, o se mea lelei lou totogiina o lea tupe, ae faia e isi tagata tonu e aunoa ma sou sao i ai?
Ou te talosagaina ai taitai o faalapotopotoga tumaoti, ekalesia, pisinisi, aoga, faapea foi soo se aiga o loo afifio i Magele nei, o lou taimi lenei e te tulai ai ma faaalia sou sao taua aua le atinaeina o le aai tutotonu o Magele.
Ua mafua ona ou faaaogaina lenei tusitusiga e auala atu ai se talosaga vaivai, ona e taua sou sao i lenei galuega. Afai e le faia sou sao, ua leai foi sau maa e togi i lea galuega, e sa loa ona e mulimuli ane toe faitio i le ata o le a faataatia mo Magele mo le lumanai.
