O loo taoto nei i le Komiti a le Palemene le fuafuaga a le Malo a le National ina ia teuteu le tulafono o Tamaiti, Talavou & Aiga (Children, Youths & Families) ina ia faamamafa le faasalaga o tamaiti ma autalavou ua faia amio solitulafono.
Fai mai le mau a le Malo National, ua toatele lava nisi o tamaiti laiti ma nisi o le autalavou o loo faia amio solitulafono. E le faamaonia le faamatalaga peitai ane o loo naunau lava le Malo ina ia sui le tulafono ma ia ave le malosiaga i Faamasino o Faamasinoga o le Autalavou ina ia mafai ona faasala tamaiti ua 12 ma le 13 tausaga mo soo se solitulafono.
I le toatele o faalapotopotoga ua momoli atu a latou talosaga i le Komiti a le Palemene o loo iloiloina le fuafuaga lea a le Malo, e tetee uma i le mau a le Malo. Peitai ane, e le solomuli lava le Malo i lana fuafuaga, ma ua toe nei o le faitauga lona tolu o lea tulafono taufaaofi, ona pasia loa lea o fuafuaga ia a le Malo.
O lo‘u popolega ua iai, o le toatele o tamaiti ma aiga o le a mamafa i ai lea tulafono, o tamaiti mai aiga Maori ma aiga o le Pasefika. O le taimi nei o tamaiti Maori ma le Pasefika lea o loo lipotia soo mai e le Ofisa o Leoleo, o latou ia o loo tulai mai ai ni faaletonu i le tele o taimi. Fai mai Leoleo, e le gata o le solitulafono, a o le matuia foi o uiga e faaalia i le faatinoga o le solitulafono, i le faaoolima ma isi sauaga, ae maise pe afai ua aafia ai ma le avamalosi.
O le itu o le avamalosi, e tele lava le faaletonu o loo tulai mai ai i tupulaga ma le autalavou, ae maise lava i tagata Pasefika. O le tele o misa e tulai mai i aiga ma nofoaga lautele, o loo lipotia mai lava e Leoleo o loo mafuli lava ia i latou o loo taumafa avamalosi.
A faatusatusa le aofai o fale faatau avamalosi i nofoaga o loo afifio ai le toatele o Pasefika ma Maori, i lo nofoaga o loo nonofo ai le toatele o Papalagi, ua mautinoa e tele atu fale faatau avamalosi i Otara, Mangere, Manurewa, Otahuhu, Papatoetoe, nai lo o nofoaga o loo toatele ai le mamalu o le tatou atunuu.
E ui i so tatou tetee i le tele o fale faatau avamalosi, ae e mafua lea tulaga ona fai mai e tele atu le faatau a Maori ma Pasefika o ia nofoaga, i lo isi nofoaga e le toatele ai o tatou tagata. O le faaletonu e le o le tele o fale faatau avamalosi, a o le toatele o tagata o loo faatauina ma taumafa i le avamalosi.
Afai o loo toatele tagata matutua i aiga o loo faia lea faataitaiga, o lona uiga o loo pue mai foi ia uiga e le isi augatupulaga o le lumanai ma sosolo ai lava le ola o ia amio ma ia faiga.
Poo le a lava le tulafono e tulai mai, poo le a foi lo‘u avaavau i totonu o le Palemene faapea e le talafeagai tulafono ua taufaaofi nei ona e aafia ai tupulaga talavou Maori ma le Pasefika, poo le a foi lo‘u tetee i le faalaiseneina o fale faatau avamalosi, a o le upu moni lava, a le ola pulea le tagata lava ia ma lona siosiomaga, ua leai lava se aoga.
O le luitau lea mo tatou uma, afai ua tatou naunau ia iai ni suiga lelei mo le lumanai, e tatau ona sui i le taimi nei. Afai e le iai ni suiga lelei i le taimi nei lava, o lona uiga o le a tumau pea faaletonu o loo feagai ma tatou i le lumanai.
