O le tauafiafi o faavauvauga, o se faaa‘oa‘o tāua ia i tatou o soifua pea

Soo se falelauasiga lava, e le o toe faamamafaina se saunoaga a se faafeagaiga i le tagata ua maliu, aua foi na te le o toe lagona mai, ae avea lea ma lesona e saga faamausali ai le tapenaga a le tagata o loo soifua pea ma maua le ola e tapenapena mamao i ai.

E ui o le iuga o tagata uma, e leiloa foi e se tasi le aso e oo mai ai le iuga i ona aso, peitai e ao lava ona sauniuni tagata uma i soo se taimi.

Ina ua logoina le tala ua maliu se tasi o toa manumanu, o se toeaina e malosi lana galue i le faaletino ma le faaleagaga i totonu o le matagaluega SISDAC i Kuiniselani, sa faigata ona talitonuina e le toatele pe a fuafua i le malosi, leai se gasegase faatasi ai ma le lē mautonu lava i le tala aave, ua na o le Atua lava e silafia mea uma ma ala o le tagata.

O le taimi a o tau faatino togafitiga a fomai pe faamata e manuia taumafaiga i le susuga i le toeaina ia Peme Faanānā, na lē mau manatu si ona faletua ia Lavalea ma faapea ona tautalatala lemu, “E! le oti e o fea ea o iai lou tui”? O le tui e le utufia ai loifofoga maligi sei vagana ua  talitonu ma le faatuatua i le taeao faaauro e toe fafagu ai e Iesu e na momoe o ia Keriso.

Na maliu filemu le susuga i le Toeaina ia Peme Faanānā i le aoauli o le Aso Sa, 27 o Me a o feagai ma galuega a le Ekalesia. E lei afaina ona o se galuega ae masalomia lava o se gasegase na oso faafuasei a o nofonofo i lalo o se laau faatasi ma nisi o tiakono.

O ona sauniga faaleaiga sa faia i le po o le Aso Lua 5 o Iuni ma faataunuuina ona toe sauniga i le Aso Lulu na sosoo ai.

Sa fai sao le taitai matagaluega ia Pr Lagolago Levae o le auauna foi lea sa fafagaina le soifua auauna o le susuga i le toeaina faapea le susuga ia Pr Togamau Tuia i sauniga faaleaiga ma le lagolagosua a auauna uma a le Atua i le Matagaluega.

Na malaga uma mai ona uso ma tuafafine faapea si ona tuaa mai Samoa le afioga ia Faanānā ma Satufia Satupea.

O se sauniga na molimauina le faatumulia e le gata o le Matagaluega ae faapea foi i le tele o tagata taitoatasi ma lana aufaigaluega i lana galuega.

Tau ina ia faamaise le agaga o le Atua i le faletua ia Lavalea ma le nofoaalo ma aiga-ga-lua aemaise lana Ekalesia pele i Dara e tusa ai ma le misia o le mafutaga ma lea auauna faagalogata, o se tagata loto alofa, onosai, faamagalo, faapalepale ma tauivi mo le Alii.