O le talitonuga faalelotu poo le talitonuga faafomai?

I le faitau atu i nusipepa ua faasalalauina nei le mafatiaga o se tasi teineitiiti lua tausaga, ua fefāloa‘i ai le talitonuga faalelotu ma le naunau o foma‘i e faatino lo latou tiute mo le faasaoina o le gasegase ua tulaga faigata i le tigaina.

E talitonu ni isi tapuaiga (e le faailoaina le igoa o le lotu) e lē mananao e toe faaaogā le toto ua aveesea mai le tino o le tagata i totonu o se isi tagata. E talitonu fomai e ao ona faia se taotoga mo le suia o fatuga‘o (kidney transplant) o si teineitiiti lea ma e manaomia se toto e tui i le tino o le gasegase mo lona faasaoina.

Na uma lea fefāloa‘iga o mātua ma le ofisa o fomai ma na iu loa ina ave e le ofisa o fomai i le faamasinoga. O lea na faia ai le faaiuga a le faamasino ina ia faia togafiti a fomai mo lea tagataola ma ua maua ai nei le tala fiafia o loo faasolosolo manuia le ma‘i.

O le fesili e tulai mai i nei faafitauli ona ua lē na o le pau ai lea o ni tulaga faapea e tutupu mai ona o talitonuga faalelotu o nisi.

“O fea le talitonuga e ao ona tuu i ai le faatuatuaga o tagata? O le lotu poo fomai?” Manatua foi fai mai le upu; e lē aogā le faatuatua ae leai se galuega. Afai e ma‘i ma tuu i le fale e aunoa ma le sailia o se fofo ma se fomai, e lē oo se faamalologa i le ma‘i.