E lei faatamala mātua ma aiga aemaise o le aufaauu a Whitireia New Zealand i le faamanatuina o le iu manuia o taumafaiga a i latou na aoaoina faasikolasipi i le polokalame o matata eseese mo tagata Pasefika (Pacific Trades Training) i totonu o le Politekenika a Whitireia. Na auai faatasi i le sauniga o lenei sauniga faaiu o le tausaga le tele o susuga i faafeagaiga mai le itumalo o Ueligitone ona o lenei polokalame e lagolago malosi tele e ekalesia Pasefika i totonu o le Laumua.
O Rev Perema Leasi, Taitaifono o le Mafutaga a Faifeau i Porirua na taitaia le sauniga lotu, a o le susuga ia Tauinaola Tofilau, Taitaifono o le Mafutaga a Faifeau Samoa i Ueligitone na saunoa e faafeiloaia le mamalu o le aufaauu, mātua, uo, malo faaaloalogia ma faiaoga na auai i lea faamoemoe.
E 18 i latou ua faamanuiaina i tusipasi i galuega faakamuta, palama, ma galuega tau eletise. O le aso 16 o Tesema e faataunuu ai le faauuga aloaia o i latou nei ma isi tagata mai isi matata o Whitireia ma Weltec.
E 5 Samoa, 7 Tokelau, 5 Kuki Airani, ae 1 le Maori. O alo la nei o Samoa na faamanuiaina ai mai le Trades Programme:
Faakamuta: Starla Tanoi ma I‘a Paipa
Palama: Reno Paia‘aua
Faieletise: Edward Pauta ma Mathew Feliuai.
O le pule lua o Whitireia le susuga ia Lawrence Arps na saunoa e faafetaia le aufaauu mo le taumafai, a o le susuga i le faiaoga o le faakamuta ia Tala Misky na foaia meaalofa mo le aufaauu ma le malo faaaloalogia.
Na sosoo ma faafiafiaga matagofie na saunia e le Ekalesia Metotisi mai Tawa lea e faifeau ai le susuga ia Patrick Fenika ma le faletua. O le taumafataga matagofie na saunia e sui o lea ekalesia na faaiu i ai le sauniga matagofie o le faauuga.
E momoli atu ai foi le faamalo ma faamanuiaga ia i latou uma ua faaiuina le taumafai ma ia maua ni galuega auā le tausiga o aiga.
