Lepapa Ferolita Aiono ma ona alo i le faamanatuina o lona aso soifua

Lepapa Ferolita Aiono ma ona alo i le faamanatuina o lona aso soifua

E 21 tausaga o galue faafomai le tina ia Lepapa Ferolita Aiono Fa Suamati’a i Samoa i le falemai i Leulumoega, Falelatai, Afega ma le falemai i Apia. E lua tausaga na aoga ai i lenei galuega ona galue loa lea i totonu o nei falemai. O le galuega ua iloga le fesoasoani ai o le tina i le tausiga o lona aiga aemaise lava i nai ona mātua ia Aiono Suamati’a Fagataele ma Atuaisaute Aiono Fagataele.

O lona soifuaga atoa o totonu o lona nuu o Fasitoo uta lea sa faafailele mai ai lona olaga a’oa’oina e pei ona aoga ai i le aoga tulagalua i Leulumoega, o le aoga tapuousa, ma faaiu ai loa i le aoga maualuga a Aana seia oo lava ina maua lana galuega. O se tina e fiafia tele i taaloga o le basketball ma le kirikiti ae o se tina foi e fiafia e tautua lona nuu ma le ekalesia e ala i le mafutaga a tina, o le komiti a tina, o Sa’otamaitai, faapea le aufaipese ma le Aoga Aso Sa. O le tausaga 2000 na malaga ma ai loa i Niu Sila nei ma sailiili manuia ai mo le lumanai o lona soifua aemaise o se avanoa lelei e fesoasoani ai i lona aiga i Samoa. Ina ua malaga mai le tina i lenei atunuu ma toe vaavaai ai pe toe faaauauina lana galuega sa iai i Samoa pe toe sui se isi galuega auā lona aiga.

Peitai o le talitonuga o le tina o le taimi ma lona suiga o le fuata fou ma lona lou, ua tatau foi ona sui se isi galuega e galue ai i Niu Sila, ma o lea sa ia filifili ai loa e galue faafaiaoga faataitai. O le pine autu o lana filifiliga i lea galuega ona ua sau i Niu Sila, ua vaai alofa foi i le fanau a lana fanau e tatau ona iai sana galuega e fesoasoani ai i le a’oa’oina o lana fanau laiti.

O le tausaga 2005 na aoga ai loa i le aoga faafaiaoga i Epsom e finau ai i se faailoga auā lona fia galue faafaiaoga faataitai, ma o lea sa tini ma le manuia lona faamoemoe i le faatasi mai o le Atua. O le tausaga 2007 na faaiuina ai lona taumafai ma faauu ai loa o se faiaoga faamaoni ma o lea ua galue ai i le Faavae Mautu Aoga Amata i Mount Roskill. I le lagona o le tina e sili atu ia te ia le olaga o Samoa nai lo Niu Sila, ae ui i lea e tatau lava ona galulue auā o lea e fai ma iai le suiga o le soifuaga.

O le aso 6 o Novema i le tausaga 1948 na soifua mai ai le tina ia Lepapa Ferolita Fa Suamati’a i lona nuu o Fasitoo uta. Ua atoa nei le 70 tausaga o lona soifua ae o loo galue pea mo lona aiga aemaise o lana fanau. O le afiafi o le Aso Toonai na molimauina ai le faatumulia o le Memorial Hall i Mt Eden i aiga o uo ma ē masani aemaise o lana ekalesia EFKS e pele i le loto o lenei tina sa auai atu e molimauina le faamanatuina o le atoaga o lona 70 tausaga.

Ua maualuga ma matagofie le faamoemoe o le tina ona sa faatasi mai ai nisi o ona aiga mai Ausetalia, Ueligitone, faapea nisi o lona aiga ma susuga i faafeagaiga na malaga mai Samoa. O le susuga i le faafeagaiga ia Rev Kafareli Sasagi na ia taitaiina polokalame o le aso i le sauniga lotu lea na ia molimauina ai le alofa o le Atua i le soifua galue ma le soifua tautua o le tina i totonu o le aiga ma le ekalesia. O le susuga ia Tafa Falealili ma le susuga ia Aiono Suamati’a sa fai ma fofoga o le aso a’o laua foi sa fofogaina le agaga o le faafetai i le paia o le aufaigalauega a le Atua sa faatasi atu faapea le mamalu o le auvalaaulia, ae i le taimi o faaaloaloga na saunoa ai loa le afioga ia Tafa Falealilli e momoli le faaaloalo a aiga i susuga i faafeagaiga.

O faafiafiaga eseese o le tasi lea vaaiga na felanulanuai ai le silasila ma le maimoa a le auvalaaulia ona o le matagofie o tapenaga a ausiva taitasi e pei ona iai le aoga faataitai a le Faavae Autu Aoga Amata, faafiafiaga a le autalavou faapea le mafutaga a tina o le ekalesia, faatasi ai ma isi faafiafiaga suifefiloi. O le taualuga o le aso na iloga ai ona matagofie le taumafataga na saunia ma tapenaina e le Paradise Catering.