Na tausani fiafia manu i fuga o laau ina ua alafai ma aulia le aso fou, o se aso na vaelupe maua ua leva ona lāvasi ma tulimatai i ai mafaufauga o le tele o tupulaga talavou, o se uluai tapulaa foi lea i lana savaliga pe a faamanatuina se 21 tausaga ua aulia.
O se tausaga faitaulia foi e amata ai ona sasalu meaalofa a mātua e faatino mo fanau.
Na ofaga potopoto aiga ma uo a le tamaitai o Emi Hytongue i le maota o le galuega a le Ekalesia AOG itu Samoa i Palara, i le faamanatuina o lona 21 tausaga i le Aso Toonai, 17 o Mati 2012.
Na amataina i le sauniga lotu na saunia e le susuga i le toeaina Ps Kilisimasi Hytongue, sosoo ai ma le taumafataga ona faasolo ai lea o polokalame e pei ona masani ai, ae faaiu i faafiafiaga a lana autalavou. O se aso matagofie na faatumulia i le auvalaaulia.
E momoli atu alofaaga ma faamanuiaga mai ou mātua peleina, susuga i le toeaina, Ps Kirisimasi & Bessie Hytongue, uso ma tuagane o lou tina ma ou cousins faapea foi uso ma tuafāfine o lou tamā ma ou cousins, aiga uma i Samoa, Niu Sila, Sini, Melepone faapea Kuiniselani nei ae faasilisili lau ekalesia pele AOG Palara ma le falelima.
Ia avea oe ma fetu pupula i le galuega a le Atua ma ia faaopoopo e le Atua nisi aso se tele o lou soifua Emi.
