E ui lava ina faasolo ina matutua le soifua o tina Samoa e galulue i totonu o galuega faatausimai, ma tausi tagata matutua (caregivers), peitai e lē mafai ai ona taofia le fia a‘oa‘oina pea ma le faalauteleina o le silafia mo le galuega faifai pea.
E lē gata mo le silafia atili o le galuega, ae mo le lelei lava ia ma le agai i luma o le soifua tautua e ala i avanoa faapea ma le umia o le tusipasi poo le fasipepa e pei ona faanaunau i ai le toatele ona o le faigata tele o galuega i lenei vaitaimi i totonu o Niu Sila.
O nisi o tina Samoa e galulue i le nofoaga o tagata matutua ma le galuega faatausimai i Selwyn i Pt Chevalier i Aukilani Tutotonu, sa leai se mea e gata mai ai le fiafia tele ina ua ausia lea vaega o le soifua galue. O le tufatufaina o tusipasi mo le faamaonia o tomai mo le galuega, o se faailoga foi lea o le taliaina e soo se atunuu lava e agai i ai mo galuega faatausi matua.
O nisi ua silia i le tai sefulu tausaga o galulue pea i lea foi ituaiga galuega, a o nisi foi e fou atu i totonu, peitai o le faamalosia ma le faatauanau ina ia toe suesueina atili ma toe a‘oa‘oina mo le galuega, sa avea o se fafagu ma se luitau tele mo i latou.
O le vaiaso talu ai na tufatufaina ai tusi taualoa mo i latou uma mo lea galuega.
O tusipasi sa tuuina mo i latou, o se faitotoa foi lea ua matala mo soo se galuega lava faapea, i soo se nofoaga e manaomia ai, ae faapea foi fafo atu o Niu Sila.
O se avanoa foi o le a siitia ai le tulaga i totonu o galuega, ae o le sili ai ona siitia le tulaga o tupe maua ma totogi e fesoasoani ai mo le tausia o aiga ma fanau. Malo lava le taumafai, ma le lē faalogologo tiga!
