Kenese 37:2 “na tala mai e Iosefa le tala i a latou amio leaga i lo latou tama.”
Sa oo i le isi aso, ona fai lea o le miti a le isi alii faipisinisi e faapea: Ua tu mai le agelu ma faapea mai, soo se mea e te manao ai, ou te faia mo oe, ae ou te faalua ona fai m o le isi alii faipisinisi.
Afai e te fia milionea, e fai oe ma milionea, ae faaluaina le milionea o le isi alii ia te oe. A e fia soifua e oo i le selau tausaga, ou te faia foi, ae luaselau tausaga e oo i ai le isi alii. Soo se mea e te manao ai, ou te faia, ae manatua, e faaluaina mo le isi alii faipisinisi.
Sa mafaufau le alii lenei poo le ā se mea e manao ai e fai mo ia, ae o loo faalavelave foi i lona manatunatu le isi faipisinisi. Sa tonu i lona manatu ma fai i le agelu, ou te manao ia ivi lo‘u mata e tasi.
O le manatu o le alii lea, a ivi lona mata e tasi, ae ivi uma ai mata e lua o le isi ona uso faipisinisi. O le loto leaga ma le ola faufau i le isi tagata, o se mea ua tele ina faaleagaina ai aiga, ekalesia ma fefulituaa‘i ai fanau.
Pei o Iosefa, sa agaleagaina e ona uso, auā e faamatala uma e Iosefa mea valea a ona uso i lo latou tamā. E matutua, ae fai mea sese. E lē ava ma faaaloalo i faatonuga a le toeaina. A o Iosefa na te faamatala ia Iakopo mea uma.
Atonu e manatu nisi e tautalaititi pe faitatala. Atonu foi e faapea ane, e fia amiotonu ma fia lelei. Ae leai, sa iloa e Iosefa usitai i faatonuga mo latou, ma mea e lē tatau na fai. Ae sa avea ma mea e inosia ai e ona uso matutua, ma lamalama ia faaleaga Iosefa.
Ina ua faamatala e Iosefa ana miti, ua atili ai na inoino ona uso ia te ia. O miti mai le Atua, o miti o le taunuuga o lona soifua, ma sa taunuu uma.
Peitai, o le loto lē lelei e lei talitonuina ai e ona uso. Ua avea lo latou inoino, ua punitia ai o latou manatu i le faaaogāina e le Atua o lo latou uso laitiiti e laveaina lo latou lumanai.
E iai au uo, poo nisi o lou aiga, e te faamatala atu i ai sou faamoemoe, ae aamu ma inoino ia te oe. E iai foi nisi e taumafai e taofi oe mai ni mea ua valaauina ai oe e le Atua. E iai ma isi e filigā latou te pupuni ou mata ne‘i e iloa mea tonu, ma taitai oe i mea sese, ne‘i faamalamalamaina oe i le finagalo o le Atua, pei o uso o Iosefa. Ia e aloalo ese ma tagata latou te lē talitonuina ou agavaa mai le Atua, aemaise nisi e faamata‘u oe ina ia e usitai ma fai mea latou te mananao ai.
E sagisagi fiafia atu lava Iosefa i mea uma i totonu o lona aiga, ae lilo ia te ia o loo lamalama ona uso e fasiotia o ia. Na te lei manatu foi e oo ni manatu i ona uso i ni tulaga matuia faapea.
Sa matuā lē iloa e Iosefa mea o loo agai mai ia te ia. Faapea lo tatou ola ma lo outou soifua, e te fealualuai lava ae e te lē iloa o loo mulu ane oe e isi. Pei o le muagagana a le atunuu, e lele le lulu ae valovaloia e iao.
Talofa ia Iosefa. Ae o le mea matagofie naua, sa silafia uma e le Atua mailei ma galuega a le fili. Poo ai foi o taumafai e faaleaga ia te oe, e te lē iloa, ae e silafia uma e le Atua. E tatau ai lo tatou faatuatua ia te Ia, auā na o Ia e silafia mea uma ma mailei a le fili.
O le autū o le LUITAU o lenei vaiaso, o le Rosa i totonu o le vao tuitui. Tiga na utia i faigata, tiga na fetaiai ma amioga a tagata lē taupulea ma amio tuia pei o vao tuitui, ae lei suia le sasala o lona matagofie pei se rosa matala. E lei fia taui ma sui pe faufau ni malaia mo ona uso, na o lona faatuatua lava, o le Atua lona talita.
Aua tatou te pei o le alii faipisinisi tau lamalama o loo ta‘ua i luga, e lē manatu lava i se mea e tauleleia ai le isi tagata. Ua sili ia te ia le ivi o lona mata e tasi, ae ia tauaso uma ai mata o le isi ona uso a tagata. Ia manatua, o loo tatou ola ma outou soifua i se lalolagi e tumu i faigata. Ae aua ne‘i liua lo tatou faalagolago ia Iesu, o ia lo tatou maluapapa mai matagi vale o le olaga nei.
Taofi mau pea lou faatuatua. Tautala pea i le tonu ma le sa‘o. Aua ne‘i faavaivai i le fai o le amio tonu, auā e fiafia mai ai le Atua. Faamalosi pea oe ma lou aiga. Toaga e tatalo ma sailiili afioga a le Atua. Foai ma le talitonu, e tauia e le Atua mea uma. Taofi i le agamalu ma le loto mamā, o taulaga ia e fiafia ai le Atua.
Aua tatou te taulagi ma faapea; e lē tauilo fanau a tamalii. Ioe, e iloa foi fanau a le Atua i totonu o faigata. Pei o la Paulo, o le manogi o le ola, e oo atu ai le ola i isi. Soifua.
