1 Timoteo 2:1-2 “O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma lava ua iai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie’.
O le manuia o nuu ma malo e le faalagolago pitotasi faapea na o le aufaipolokiki, ae faamoemoe foi i tatalo a le aufaatuatua. Latou e silafia le Atua ma lana pule mamana mai lugā. O le lumanai manuia foi o aiga ma fanau e le faamoemoe na o aoga ia atamamai ai, ae manaomia faatasi ma talotaloga, auā e mafai ma popoto, ae latou te teena le Atua. E mafai foi ona manuia ma maua galuega lelei, ae o ese ma le faavae faakerisiano sa tatou amata mai ai. O lona uiga, e tāua le tatalo.
Auā o filifiliga a malo ma tulafono faataatitia, e aafia ai le soifua o tagata taitoatasi ma le lautele, aofia ai ma le lumanai o a tatou fanau.
Ua poloai le aposetolo ia Timoteo, ia tatalo. E manino le Luitau, auā ua faateteleina mea faigata ua tutupu, ua faigofie foi ona faagalogalo e tagata le tatalo ile Atua.
Aisea? Masalo e faalēkeakea, po ua manatu māmā foi i le mana o le tatalo. Pe atonu ua fa‘atu ona ua faatuputupulaia amioga matagā, ua manatu ai, ua le toe mafai e ni tatalo ona suia le taaviliga saosaoa ma le faigata ua oo i ai lo tatou lalolagi.
Pe faapea foi, tatou te fiu lava e tatalo, ua oo mai lava taimi leaga, o lona uiga e maumau le taimi e tatalo ai. Pe faapea foi, e le mafai e le tatalo ona suia loto o tupu ma aloalii, ua tupu tele lava le agasala.
Afai o lea, o lona uiga ua tatou manatu, e leai se mana o i le tatalo, auā e oo lava foi i faiga lotu ua seāseā ona toe fai ni fonotatalo.
Ae ua aumai le aveai ia Timoteo, ma tatou, ia tatalo. O le mau a Paulo i le Tusi a Roma “ia usiusitai tagata uma i faipule silisili; aua e leai se pule pe a le mai le Atua.”
O le faanoanoaga, e toaitiiti e talitonu i le mau lenei. Aua ua tetee tagata i pulega, tausolomua tatou. E tele ina talapepelo, lē faamaoni pe a faatumu pepa poo ni talosaga i mea manaomia.
E lē totogia pili ma mea e tatau ona fai, sau i TV tagata e molia i le fagota solitulafono o pāua, o tagata e aumai e tafafao ae faaovasiteia iinei, ma le anoano o faataitaiga e iloa ai le tetee i le pule.
I se isi foi itu, e iai taimi tatou te tuua‘ia ai taitai o malo poo pule o galuega e faapea e lē lolotu, e faapaupau ma amio paaa. O lo tatou valaauina tonu lea o loo aumai i le tatou matua, ia tatalo mo latou.
O le tatalo, o le faatauanau lea i le Atua e fesoasoani ma galue i loto ma filifiliga fai a taitai poo ni pule. O le Faataoto 21:1 e faapea: “o le finagalo o le tupu, o vaita‘i ia i le aao o le Alii.” O lona faamatalaina, o filifiliga a le tupu, e pei o vai e fetaia‘i, i le pule ma le mana o le aao o le Atua.
O lona uiga, e mafai e le Atua ona suia filifiliga a le tupu, poo se palemia. E pei o alavai e pule a ia i le mea e ta‘i i ai, a o le galuega fai a tatou, o le tatalo. E mafai e le mana mai lugā ona suia mea e loto i ai le tagata.
O le afioga a le Atua, e moni ma faamaoni, afai tatou te tatalo mo tatou taitai, e tali mai le Atua. Na te suia loto o soo se tagata, pe peresetene o se malo, poo se palemia, pule o le galuega, poo ai lava, e mafai e le mana mai luga ona suia. Auā e leai se isi e faasagatau i le Atua, e leai se isi e pulega faatasi ma ia, e leai foi sē la te tutusa poo se malosi i lalo o le la e faatusaina lona mamana.
Ae faato‘ā faaalia lea mana, ina ua tatalo le aufaatuatua. Manatua le fetalaiga a Iesu i le Mataio 18:18, “E moni, ou te fai atu ia te outou, O mea uma tou te fusifusia i le lalolagi, e fusifusia ia i le lagi; o mea uma foi tou te talā i le lalolagi, e tatalaina ia i le lagi.”
Ua saunoa Iesu i le pule ua tuuina mai i le au faatuatua. O le pule e atiae ai ma solōia ai. O le pule e faasagatau atu ai i le fili ma ana mailei.
Ina ua falepuipui Peteru (Galuega 12), sa nofo sauni Herota e fasioti Peteru i le aso e sosoo ai. Sa lē taunuu lea mailei a le fili ina ua faasao e le agelu Peteru mai le falepuipui.
Ae o le tatalo a le Ekalesia, na auina mai ai e le Atua le agelu e laveai lana auauna. O le tatalo a le aufaatuatua, sa faia ai e le agelu se vavega ofoofogia, e oo lava i le au tatalo e lei talitonu o Peteru lea ua toe foi ane.
O le tatalo, e faaalia ai le mamana o le pule mai lugā. Ae lē tupu fua, vaganā ua tatou loto i le tatalo, ma tatalo ma le faatauanau.
A tatou lē tatalo, ua tatou fai atu i le Atua, matou te lē manaomia oe, o lea lava matou te iloa mea e fai, lea foi e mafai e matou ona fai mea matou te manano ai. Ae talofa, e mu loa le lima, tapa loa i le iofi.
O le tatalo, o le faatuatua lea ma le faalagolago i le Atua. Ina ua fesiligia Dr Yonggi Cho pe aisea ua toatele ai lana ekalesia, e lata i le miliona le aulotu i Korea i Saute, o lana tali, muamua, tatalo. Lua, tatalo. Ma lona tolu, tatalo. E tāua le tatalo. Soifua.