Ua maea le faiga palota laititi mo le itumalo o Mt Albert i le Aso Toonai ua tea nei ma ua manumalo le sui tauva a le Leipa. O le aofai o palota a David Shearer na maua e 12,613 palota a o palota a le sui o le National na sosoo mai i ai e 3,426.
Sa atagia mai foi i lenei faiga palota i Mt Albert, le toatele o nisi e lei faatinoina le latou palota ma e foliga mai e le taua ia i latou le faaaogaina o le latou aia tatau i le faatinoina lea o le latou palota. Mai i le 1986 ina ua amata ona ou galue ma avea au ma sui auai o le Leipa, ua maitauina pea le masani o nisi o tatou tagata o le le faaaogaina lea o a latou palota.
O nisi e lei resitala mo faiga palota, o nisi foi e sui fale e nonofo ai ae le suia tuatusi i le lisi o le aupalota, a o nisi foi ua maea ona resitala, ae e lei faatinoina le palota.
Ina ua manumalo le vaega a le National i le faiga palota o le tausaga ua tea, e toatele nisi sa fesili mai pe faapefea ona malolo le Leipa.
O le tali puupuu i lea fesili, e toatele tagata sa tatau ona palota, ae e lei palota. Taatia ia le vaega lea na palota mo isi vaega faaupufai, o le faitalia lava a le tagata e fai ai lana filifiliga, ae o loo manino lelei le toatele o o tatou tagata e lei palota, ma e foliga o le masani lea a nisi o i tatou.
O le mea moni lava a tatou le naunau ia malamalama i nei tulaga ma taumafai e auai i tulaga faapolokiki i Niu Sila, o le a faia e nisi tagata se faaiuga e aafia ai i tatou uma.
Afai ua avea Niu Sila ma o tatou atunuu ua aumau ai, e tatau ona tatou malamalama ma manino i auala e mafai ai ona oo atu so tatou sao i faaiuga fai a vaega faaupufai.
E taua le tatou auai ma malamalama i tulaga faapolokiki i Niu Sila, aua o faaiuga e faia faalemalo e aafia uma ai i tatou ma o tatou aiga.
O se faataitaiga, o lea ua faatulaga e le faigamalo a le National le suiga o le pulega o Aukilani aoao. O ia suiga e aafia uma ai lava aiga ma tagata uma i Aukilani. O lenei pulega fou o le a latou faia faaiuga mo le totogiina o lafoga, e aofia ai lafoga a Ekalesia, le faaaogaina o paka mo taaloga, faletusi mo fanau, auala savali ma auala taavale, o le totogi o le suavai taumafa, le aoina o lapisi, ma le anoanoai o isi auaunaga e amata mai i tamaiti seia oo i tagata matutua. E le gata i le suiga o le Pulega mo Aukilani, ae o le a suia ai foi ma faavae o le totogiina o le tele o auaunaga i totonu o Aukilani.
O le a tonu le mafuaaga o ia suiga? Ona o faiga faavae ma le filosofia masani a le National ma le ACT, e ave lava le faamuamua i faiga faapisinisi faapea le talitonuga, e tu lava le tagata ia i ona lava vae (sei tulou).
O loo manino mai lava le naunau o le faigamalo ina ia latou umia le tele o aseta taua o loo pulea e faigamalo laiti, e pei o fanua ma eleele, fale o loo nonofo ai tagata matutua, o kamupani o le suavai taumafa, o sea o le malae vaalele, ma le tele o isi aseta taua e lata i le $28 piliona le tau aofai o ia aseta. E le gata i lea a o le tele o aseta e pei o le kamupani o le suavai ma sea o le malae vaalele, o ia aseta o loo maua mai ai vaega tupe o loo faatupeina ai le tele o auaunaga mo le manuia o tagata lautele.
Afai ae pulea e le tagata e toatasi ia aseta, o ai a manuia ai i nei aseta? A o ia aseta na faatupe e tagata lautele ona o le naunautaiga ina ia manuia ai tagata lautele ma le agai i luma.
O se tasi lea o mafuaaga e taua ai tele tulaga faapolokiki faapea le sailiili ma le malamalama i faiga faavae o vaega faaupufai.
Ou te talitonu o le palota o le faavae lea o le faatinoina o lau aia tatau faatemokalasi. Puipui i ou aia tatau, faaaoga le avanoa e faia ai lau filifiliga saoloto, aua se manuia mo oe ma lou aiga. Ou te talitonu afai ua le faaaoga lau palota i taimi o faiga palota, ua e foai lau meaalofa ma lou saolotoga i tagata ese e latou te faia ai faaiuga e aafia ai oe.
E moni e pule lava le tagata i lana aia tatau, ae a le faatauaina faiga palota, e mulimuli ane salamo i suiga e faia e faigamalo, ae ua le toe iai se avanoa e faia ai sou finagalo aua ua e le faaaogaina le avanoa na tuuina mai ia te oe.
Nei faapea ane se tasi a le palota e leai se afaina. Ou te talitonu e matua sese lava lenei talitonuga.
