“O le pagota na tusia le tusi na ave ia Toi”…Palemia

Afioga i le Palemia susuga Tuilaepa Lupesoliai Sailele Malielegaoi
Afioga i le Palemia susuga Tuilaepa Lupesoliai Sailele Malielegaoi

O se pagota sa tuli sona faasalaga i le toese i Tafaigata na tusia le tusi na ave i a Toi ma Leafa i le faalavelave na tagatavaleina ai Luagalau Levaula Kamu sa avea ma Minisita o Galuega. 

O le tali lea a le Palemia susuga Tuilaepa L Sailele Malielegaoi agai i le tusi o loo salalau nei ona faamatalaga i fesootaiga televavave le social media.  O le tusi lea na faasalalau i luga o le api o foliga le facebook e Malele Atofu Paulo poo King Faipopo, o loo tuua’ia nei i moliaga o le faia o faasalalauga tau faaleaga i le Palemia o le atunuu.  I se finagalo faalauaitele o le Palemia ua aumai i se tulaga faalauaitele, ua ia faailoa ai ua 20 tausaga le umi talu ona tusia lea tusi, ma sa logoina o ia i lea taimi o se pagota na tusiaina lea tusi ma e lē o se mea moni ae o se tusi tau faasese poo se fake letter.

O le faamalamalamaina e Tuilaepa o le tusi o loo ia ta’ua ai o loo faatuatusi i a Auelua T poo Auelua Tuilaepa, peitai e le mafai ona ia toe tusi se tusi ia te ia lava. 

O le aso 25 o Novema o le tausaga e 2007 na tusia ai lea tusi peitai o le tausaga e 2015 na faaalia e le Palemia na faatoa faaee ai le suafa Auelua o lo latou aiga ia te ia.  O loo finau mai le palemia e iloa i le faaupuina o le tusi e lē o ni ana tusitusiga ia, ma e lē o ni ona manatu foi. 

Ua ia teena foi o lana saini lea o loo iai ma o se saini e pepelo ma tau faasese. E lē o se taimi muamua lea ua faia ai e nisi ni gaioiga faapea ma ua faaalia e le palemia ua iai tagata ua falepuipui ai. I le finagalo faalauaitele o le Palemia ua ia faailoa ai foi ua galulue nei i latou e gafa ma suesuega o mataupu faapea e saili ma sueni uma i luga le mataupu, ina ia taunuu lenei mataupu i se taunuuga e faamuta ai le toe  feaveai solo i luga o fesootaiga televavave o lea tusi ini faiga a nisi tagata e faamalepe ai sootaga o tagata ma aiga, ae o ni gaioiga ma’ale’ale o loo taulai i le faaleaga ai o tagata.

O le faamasinoga o Malele Atofu Paulo o le a agai ai suesuega i le tusi o se tasi o vaega o loo faavae ai moliaga a leoleo.  O le a tatou iloa ai foi se molimau a King Faipopo poo fea na ia maua ai lea tusi ae o ai foi na tusia. Ua tetee Malele Atofu poo King Faipopo i moliaga e 13 o le faia o faasalalauga taufaasese ma le taufaaleaga.  O le sala tupe ma le faasalaga faafalepuipui o loo aiaia e faasala ai se tagata e faamaonia lona soli o lea tulafono.