“O le tolusefulu lenei o tausaga faato‘ā toe faaee lea o le suafa Feagaimaalii o lenei nuu”
O suafa matai autū o aiga ma nuu e faasino i suafa faasa‘osa‘o ma suafa Tuua poo matai tulafale e faia tonu ma upu o nuu ma aiga, e tuai lava ona maua pe a mavae atu se tasi poo se isi sa umia auā e faigata le filifiliga, ma e mananao uma foi suli e fia pa‘i i ai.
O le ala i le pule le tautua, ma e tautala foi galuega fai ma le lima malosi o se tasi e tusi aao i ai le aiga potopoto e faaee i ai se suafa matai tāua, ae eseese lava aiga o le atunuu ma mafuaaga e faavae ai a latou filifiliga.
O le afioaga o Matautu i Apia i le afio o Alosina, alalatai le Faletolu ma le Vainalepa ma lo la toalua ma le mamalu ia Tuisamau, o le suafa Feagaimaalii o le fofoga lea o Toomalatai.
O loo iai se tasi o suli tamaitai o le afioaga o loo umia le suafa ae e ‘ai tau malele peitai ona o le matua o lona soifua ma le siisii gata pe a malaga mai i Samoa mo mea fai, o le mafuaaga lea ua iai lona maliega faatasi ai ma le afioga Toomalatai faapea suli uma o le aiga e faaee le suafa Feagaimaali i le tofa Nanai Malae o se suli o Toomalatai Lepili II o loo tausia nei le aiga.
“Ou te lagona o lea ua ou nofo i le suafa ae e lē faigofie ona o se suafa e galue. E lē gata i le nofo tuavae auā le faafeagai ai ma le Sa‘o ae o le vaai foi i aiga. Ou te tatalo i le Alii ia faagaganaina lo‘u tagata ma ou te faafetai ai foi i le galuega a o’u matua o lea ua ou solisoli mulivae ai”.
O le lagona faaalia lea o le nofo fou o le suafa ua filifilia ma ua mae‘a ona faatino e ala i le faafotu o le vaaulu sa faatino i le maota o Toomalatai i Matautu i le Aso Faraile, aso 4 Novema 2011.
O le sauniga lotu na tomua a‘i le polokalame sa taitaia e le susuga i le faafeagaiga o le EFKS i Matautu i Apia le susuga Moli Moli, sosoo ai ma le usu a lele a le nuu ma le itumalo ma le faapaiaina o le nofo.
O le tofa Lealaitogi‘ai na fetalai ‘ava, ae o le fetalaiga Pupualii Senio na tasi i ai le sivaloa ma le faatau paia e lauga. Faaalia e Pupualii ua 30 nei tausaga o lea faato‘ā toe faia se saofai i le suafa Feagaimaalii i totonu o le afioaga.
O le nofo i le suafa Feagaimaalii ua tulai mai nei e fai ma fofoga o Toomalatai o loo ia umia nisi o suafa tāua ma o suafa foi e feagai ma upufai o nuu. O le suafa Nanai ma Misa e faasino i le Aiga Tauaana ma le latou tama, o le suafa Tuitama ma le suafa Tofilau.
“E tele le tāua o nei suafa o loo ia te au ma o le amanaia foi lea e aiga o si o‘u tina ma si o‘u tamā o le tautua ua aumai ai le latou faatuatuaga ou te umia nei suafa uma.
E lē mafai ona aumai pe a leai se tautua ma o galuega foi a nai o‘u mātua ua ou solisoli mulivae ai”.
Sa fesiligia Feagaimaalii i nei suafa uma auā o ni suafa e toomaga i ai nuu ma aiga i tonu fai, pe faamata o le ā sana fua auā e faalagolago uma ona tiute faamatai i lona tamaoaiga.
“E taumafai e fai uma lava mea e fai, poo le ā le lē lava o le faasoa, e taumafai lava e faamalie auā o tatou e faapena le soifuaga. Ae afai lava ua lē mafai, o inā e faaaogā i ai le faautautaga tatau ma e ao lava ona faamalie i se mea e oo i ai le malosi”.
Sa malaga mai tuafāfine ma tauaiga o le tofa Feagaimaali Nanai Malae i le faamoemoe ma o se mitamitaga foi lea o le nofo ua filifilia, auā o le latou lagolago ua faigofie ma māmā ai le avega. Ua 51 tausaga o le soifua o le fofoga o Toomalatai ma o loo mau paolo ia Setoga, o se alo o Gogouli ma Maiava o Utualii.
O loo galue nei i le vaega o le tiute i le Matagaluega o Tupe Maua ma ua silia nei i le 20 tausaga o tautua ai i le Malo ma le atunuu.