O le viiga ma le faaneetaga e tumau atu pea i le Atua poto e toatasi. O Ia lava ua tatou maua ai le ola tului ma le manuia. Lenei ua toe aulia mai ai lenei vaiaso fou i le amataga o galuega ma faiva ua tofia ai i tatou e le Atua. Ua tuanai atu foi le Aso sapati sa tatou faamanatuina ai lona toetu manumalo mai le oti ma le tuugamau, o se mea e ao ona faafiafiaina ai oe ma au le tagata kerisiano, ona o le faailoga lena o le manumalo aiai o lo tatou Atua. Foi atu la ia te ia le mamalu ma le faaneetaga, aua ua onomea ma tatau ona matua viia o Ia.
Faamalo atu foi le folau Samoa, ua seesee malie atu foi lo tatou sa, lenei ua tea atu le kuata o lenei tausaga. E ui lava ina fesouaina la tatou faiga malaga i lea aso ma lea aso, ae ia mau pea o tatou loto, o Iesu o lo tatou tautai matapalapala, o Ia o lo tatou leoleo mamoe lelei, fai mai e le moe e le tulimoe lava ia, o le leoleo o Isaraelu, o loo leoleo foi ia oe ma au i aso uma lava. Viia le Atua.
1 Peteru 1:3 “Ia faafetaia le Atua, le tama o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti …
O loo taua i le molimau a se tasi tagata tautaua e suafa ia Michelangelo e faapea, “Pe aisea ua matua faatumulia ai le tele o fale mataaga i totonu o Europa i tusitusiga ma ata o Iesu o loo tautau i luga o le satauro. Sa tuufesili ai pea o ia, pe aisea lava ua ave ai le faataua a tagata tusi ata ma le au tusitala i lenei mataupu, ae i lona manatu o le tautau ai o Iesu i luga o le satauro ua na o se taimi puupuu lava na tupu ai, ma ua na o se ata foi e le o iai se faaiuga, ona e le o le iuga lea o le tala atoa o le mea na tupu.
Sa manatu Michelangelo, sa tatau ona ave le faataua i le mea na tupu ina ua tuanai le tautau ai o Iesu i luga o le satauro, aua o ina o loo valivali mai ai le taunuuga o le tala moni o le mea sa tupu. Pei lava ona e silafia Samoa, soo se tagata tusi ata lava e tatau ona iai se uiga, poo se tala e faamatala mai i ana valivaliga.
I le manatu la o Michaelangelo, e le o atoa le tala o loo taumafai tagata tusi ata nei e valivali mai, ua na o se vaega o le tala, a o le mea sili ona taua ua latou misia, ona e le o le faaiuga lena o le tala i le maliu o Iesu. E lei tautau ai pea o ia i le satauro e faavavau, o le mea moni, ua toe tu Iesu.
Ou te talitonu foi Samoa lou atunuu pele, o le ata lena o loo taumafai le alii o lenei lalolagi e valivali mai mo i tatou. O manatu o le toilalo, o manatu o le faamaina, o manatu o le faavaivai, ae o le faamalosi a le Taiala i lenei vaiaso Samoa e, ia tatou iloa, ua toe tu Iesu. Sa le mafai e le malosi o le oti ma le tuugamau ona taofiofia Iesu, ua toe tu manumalo mai o Ia. Aisea la e te le vivii ai i le Atua Samoa, o le toetu manumalo o lo tatou Alii o le faailoga lea o lou manumalo ma lou foi manumalo mai tuinanauga ma mea uma e faavaivaia ai tatou. Ou te faapea atu Samoa e, e leai, leai lava se mea e mafai ona taofia i tatou mai le mana o le toetu o Keriso.
O le upu moni, o le ogatotonu galemu lea o le molimau a le au kerisiano. O le ute poo le fatu lea o lo tatou talitonuga faakerisiano. Talitonu o le a tau pepeloina la tatou molimau pe ana le toe tu Iesu. O se molimau e pe e leai se faamoemoe, pe ana le toe tu mai Iesu. O lona toetu manumalo mai o se fiafiaga tele poo se mitamitaga lea i le au kerisiano.
E tusa ai ma le molimau a Mataio 27:62-66, na manatua lelei lava e le au ositaulaga sili ma le au faresaio a o lei maliu Iesu, na ia folafola ia i latou, a mavae aso e tolu e toe tu mai. O le mea lena na faatopetope atu ai i latou ia Pilato, ina ia matua faamauina le gutu o le tuugamau seia oo i le aso tolu, aua ua latou manatu, nei o atu ona soo ma gaoi mai lona tino, ona faapea ai lea ua toetu Iesu. Sa faapea lava ona latou o atu, ua faamauina le tuugamau, ua faamau faailogaina foi i le maa, ma tuu ai ma tagata e leoleo. Ae talofa e, sa le mafai e nei mea uma ona taofia ai le toetu manumalo mai o lo tatou alii faaola o Iesu Keriso.
Sa taumafai malosi le au ositaulaga ma le au faresaio ina ia aua, aua lava nei tupu le tulaga lea na folafola mai e Iesu. Sa latou taumafai e faamaonia le latou molimau, o Iesu e pepelo ana aoaoga, ma o le pepelo lava ia. Ae talofa ia i latou, tagata le talitonu ma le malamalama, tagata fouvale ma le aatui i le finagalo o le Atua. E moni ai le Salamo 2: “E soisoi le o loo afio i le lagi, e tauemu le Alii ia te i latou.”
Ou te le iloa ia te oe poo le a le mea o loo e talitonu i ai, poo e auai faatasi ma le au ositaulaga ma le au faresaio i lo latou manatu e le moni le molimau a Iesu Keriso, ae manatu le Taiala e faamalosi ia te oe se tina, se tama, se atalii poo se afafine aemaise le au faitau a le tatou nusipepa, Aisea e te le toe manatu ifo ai nei. O le galuega maeaea lena a Iesu na faia mo i tatou, sa maliu ma tanumia, o le faailoga o le toilalo ma le mataga, ae ua toe tu mai, o le faailoga o le faaeaina ma le manumalo ina ia faaolaina oe ma au le tagata agasala.
Aisea e te le talia ai nei o Ia i lou loto? Talia lana faaolataga, talia lana meaalofa foaifuaina mai mo oe ma au. Roma 10:9 “Afai e te tautino i lou gutu i le Alii o Iesu, ma faatuatua i lou loto ua toe faatuina mai o Ia e le Atua nai e ua oti, e faaolaina ai oe. Aua o le loto e faatuatua ai, e oo mai ai le amiotonu, a o le gutu e tautino ai, e oo mai ai le ola.”
O le augani foi lena a Paulo i le ekalesia i Efeso, (Efeso 1:18) “… ina ia outou iloa le uiga o le faamoemoe ua i lona valaau mai, ma le uiga o le faulaigamea lelei o i lana tofiga ua silisili mo le au paia, ma le uiga o le silisili ese lava o lona malosi ua ia i tatou o e faatuatua, e tusa ma le galuega a lona mana tele lava, na ia matua galue ai ia Keriso, ina ua toe faatuina mai o Ia nai e ua oti, ma faanofo ia te ia i lona itu taumatau i mea o i le lagi.
Samoa e, o le tatalo a le Taiala, ia tatou iloa o Ia na toe faatuina le alii o Iesu, na te toe faatutuina foi i tatou. Talia nei loa o Ia, manu o maua lou avanoa.
Manuia tele le vaiaso Samoa!
