E ui ina taugata lenei soifuaga ae na lei faafiti tuagane ma mātua e faaofo le tamaitai fai aso fanau o Susana Tuisavaii Filimaea Faueā e ala i le faamanatuina o lona 21 tausaga.
E eseese foi le maitau ma le faalogologo i molimau o le soifua tuputupu a‘e o Susana, o ia o se teine usitai i mātua ma loto alofa, e pei ona potopoto ai le tele o aiga, uo ma ē masani i le afiafi o le Aso Faraile 8 o Novema 2013.
O Susana ua na o ia le tamaitai o le fanau ae toafā alii na soifua a‘e i Aukilani Niu Sila. O ona mātua o le susuga ia Terry Tuisavaii Filimaea Faueā mai Vaiala & Satupaitea, o le sui faasalalau a le leitio ale Penina o Asuisui, faapea si ona tina ia Toina Faueā mai Neiafu.
Sa taitaia le sauniga faamanuia e le susuga i le faafeagaiga ia Ps Manuula Nai o le ekalesia AOG itu palagi a Kingston. O le afioga ia Levao Uea Fepuleai sa fai ma sui o aiga e momoli le agaga faafetai i le faafeagaiga i lana galuega mae‘ae‘a, faapea faaaloaloga o lea afiafi i le auvalaaulia.
Na matagofie le faamoemoe toatele aiga, uo ma ē masani aemaise le lagolago a mātua ma nai ona tuagane. Na foi le gogo ma si ana i‘a, ta‘ape tagata uma ma le malie atoatoa i vaega uma faapea le taumafataga felanulanuai sa faatasia ai i le fale‘aiga a le Buffet Garden i Sunnybank.
Ia manuia tele lou 21 tausaga Susana, alofaaga e auina atu mai ou mātua, tuagane, nieces ma nephews, cousins, alofaaga mai ou aiga uma i Samoa, Niu Sila ma Ausetalia faasilisili foi alofaaga mai lau faifeau ia Ps Manuula ma le faletua ia Foloi Nai & aiga faapea lau ekalesia AOG itu palagi a Kingston.
