O le vaiaso muamua foi lenei ua toe foi ai fanau ma susuga i faiaoga sa feagai ai ma malologa. E le taumatea sa tuliloaina pea i latou uma i le alofa ma le agalelei o le Atua, ua talafeagai ai lo tatou faafoi faatasi ai lea o le faafetai ma le viiga ia te Ia, ona o Lona alofa le mavae pea ia te i tatou uma.
Ua laasia mai nei e le fanau le kuata mulimuli o lenei tausaga, ma o se taimi pito i taua mo nai fanau, ona o tapenaga mo iloiloga ma suesuega aua ni amataga lelei o le tausaga fou.
E pei lava ona faalogologo i leitio ma faitau i nusipepa i le anoano o nai fanau ua faaiuina manuia o latou taumafai, ae le gata foi i lea o nisi o tamā ma tina e le uma le fia faaleleia o taleni oloo galulue ai. Atonu e lei faigofie le tausinio ina ia maua le auga o faamoemoega.
Peitai, o lea ua tali mai le Atua, o ni lagona faagaeetia ma le olioli, ina ua taunuu lau o le faamoemoe. Manaia o le vaai atu i le tulai mai o matua ma foliga fiafia faapea aiga sa tapuaia faiva o le fanau.
E moni ai lava le upu o le Tusi: “O le tama poto e fiafia ai le tama, a o le tama valea e faanoanoa ai le tina.”
Ae le mafai ona manuia faatautaiga a le fanau pe a le lava le lagolago a matua ma aiga. E matua tauivi ma le fiafia le tamaitiiti pe a vaai mai i le taumafai ma le naunau atu o matua ma aiga.
O le vaiaso mulimuli o le kuata na mavae atu nei [kuata 3], sa faia ai se fiafia matagofie a matua Samoa, tamaiti, o le susuga i le alii pule, faiaoga, faapea tagata lautele i le aoga a Robertson Road i Magele.
O se vaega sa sili ona mataina, o le faafoeina lava e matua Samoa o le polokalame o le po, faapea foi ma le gasesega o taumafa, aemaise le vaaiga o fanau.
O le susuga i le tamaitai o Semeatu Iosefa o ia foi lea o le taitai o le polokalame [E faaaoga le Gagana Samoa ma le Gagana Faaperetania, e aoao ai mataupu], faapea susuga i faiaoga o, Aliitasi Tugaga, Vaipouli Siliga ma Julie Faiva, sa faamaepaepa lava latou ma fuli e faaaoga le faaili, ae faafoeina lava e le mamalu i matua le po.
O le isi vaaiga mataina, o le auai lea o le susuga i le alii pule, ma sisiva faatasi ma matua ma tamaiti i lea po, ua matua aliali mai ai foliga o le mafanafana o faigapaaga a le aoga, faiaoga, matua, ma tagata lautele. Ua vaaia le naunau o le alii pule e faamasani ma malamalama i tu ma aga a fanau, matua ma tagata lautele o si o tatou atunuu.
Aemaise lava ina ua vaaia foi aiuli i lea po, ua le manumanu i puletasi iila sa laeiina, ae ua matua sua lava le aulapa uta ma aulapa tai i le faatinoina foi o fiafiaga faasamoa. Sa tau iai sina popole ina ua vaaia le sela o si alii pule ona e taitoafa aiuli, ae le faafiti lava i le uumi o pese.
Sa auai foi le tamaitai ia Malo Sepuloni oloo faafoeina foi le polokalame oloo faaaogaina ai gagana e lua i le tulagalua a Mangere East. I lana saunoaga o lea po ina ua valaauina faaaloalo mo sona finagalo, sa ia faafetaia ai le mamalu i matua ona o le faataunuuina o la latou pitolaau aua se lumanai manuia o fanau.
O se vaega sili lea ona taua mo le manuia o fanau, o le vaaia lea o matua ua galulue faatasi ma aoga, e le gata i le fuafuaina o polokalame ina ia matua malamalama lelei, ao le lagolago foi i le faatinoina.
Atonu o se faataitaiga lelei tele lea ua amata mea ai Robertson Road Primary i lenei tausaga.
E le gata i le faatinoina o polokalame i le aoga i le faaalia o tu ma aga, o taaloga ma isi mau faatinoga, ao le vaega sili ona manaomia, o le auai ma faatasi ai i faatinoga ma faiga o filifiliga ma tonu, atoa ma le faafoeina.
E tele ina manatu tagata e leai ni o tatou tomai i le faafoeina ma fuafuaina o ni polokalame ma faatino, peitai, o tatou uma sa soifua ae i si o tatou atunuu, i totonu lava o o tatou aiga, ma o tatou nuu ma ekalesia, e iai pulega eseese latou te fuafuaina ma faafoeina fuafuaga. E tofu lava le tagata ma lana matafaioi.
E momoli atu ai le faafetai ma le faamalo i le susuga i le peresetene ma le nofo a tofi, faapea le mamalu o le mafutaga a matua i le aoga a Robertson Road i Magele, malo lava le onosai, malo le lototele. Faamalo i lou titi faitama ma lou sailimalo aua fanau mo a taeao. “O le fua e te lulu, e te toe selesele”.
