O le tele o moliaga ia e molia ai o tatou tagata i le tulafono o le Criminal Law, o tulafono e oo i le 14 tausaga le faasalaga i le falepuipui.
O isi e i lalo ifo o le 14 tausaga. Ae poo le 14 tausaga pe i lalo ifo, o le 14 tausaga, e matagā lava lou igoa, ta‘uvalea lou aiga ma lau fanau, toe faigata ona e fealuai i isi atunuu auā e suesue i fesili ia e te faatumuina i luga o le vaalele pe na e falepuipui, pe na iai ni ou criminal convictions. E lē gata i lea, e mafai e Niu Sila ona revoke pe aveese lou pemita nofo mau, ae toe deport oe i Samoa.
O moliaga ua tāua i luga, ua lē toe iai sau aiā e te tofia ai e oe lau loia e tu mo oe, pe a e faamoemoe i le Legal Aid:
Ua aveeseina e le malo le aiā a le tagata molia e na te tofia ai se loia e manao e tu mo ia, pe afai e leai sau tupe e totogi ai sau loia.
Se‘i vaganā e totogi lava e oe lau loia ona mafai lea ona e alu i se loia e te tofia, e mafai ona lua talanoa ma faamalamalama atu ia te oe mea e tatau ona e tapenaina, ina ia aua ne‘i e falepuipui.
Afai lava e matuia lau solitulafono, o le loia lelei e taumafai mea uma ia laitiiti se taimi e te falepuipui ai.
E moni e totogi lau loia, ae e tapena mae‘a galuega e sefe ai lou ola.
Manatua o loia e totogi e le malo, e faatapulaa e le malo le taimi e alu i lau galuega.
E tusa lava poo le ā le lelei o le loia, e pau lava le tiute o le loia o le fai o galuega e mafai i le taimi lea ua faatonu mai e le malo e fai ai lau case, e tusa pe leaga ona fai, ona o le lē lava o tapenaga.
O le Fautuaga:
(1) Aua le solia le tulafono. (2) Malamalama i au aiā tatau. (3) Teu ese se tupe i vaiaso taitasi auā ni nea e tutupu mai e lavelavea ai oe poo se isi o lou aiga i le tulafono, ae o la e iai le tupe e te tua i ai, e totogi ai se loia. (4) Aua e te valaau se loia e galue mo oe ae leai se tupe e totogi ai, auā e leaga le sefe mai o oe i le falepuipui ae ave oe e le loia i le tulafono e faa-Bankrupt ona ua e lē faamaoni i le totogiina o le loia. (5) E lē se mea manaia foi i le loia, le taumafai e sefe lou ola, ae toe oo i ni tulaga lē manuia, pei ona ta‘ua. Manatua o loia e ala foi ona faigaluega ma faaaogā taleni maua, ona o tupe maua, e faaaogā mo a latou fanau ma aiga.
Malamalama i au aiā tatau:
Ona o le toatele o o tatou tagata, e muamua osovale ma tautala, ae toe lavelavea mulimuli i tala na tautala ai, ona o le tautala ae lē malamalama i le tulafono.
A tuu mai se avanoa e ave sau support person i se mea e suesue ai oe, aua e te alu ma ave se tamaitiiti poo se isi na ona lua toalua. Ave sau support person e iloa le tulafono i mea ia e molia ai oe.
O le taimi lea e te tapa ai le fesoasoani a se loia e malamalama i le moliaga o feagai ma oe, ma fautua oe i mea e tatau ona e fai, ma upu e tatau ona e tautala ai.
E moni e totogi le loia, ae laitiiti mamao le totogi pe a mafai e le loia ona taofi le moliaga o oe i le taimi lea.
O se faataitaiga lata mai nei. O se tamā ua toeitiiti 20 tausaga o faigaluega. Te‘i ua molia e nisi i totonu o le fale faigaluega i ni tuuaiga lē sa‘o.
Faatonu e nofo i le fale se‘i suesue e le kamupani le moliaga. Sau loa lea tamā ia te au ma o i le taimi na tuu mai e o atu ai ma sana support person i le fono ma le pule.
Sa totogi la‘u galuega ma le taimi na ou alu ai. Ae ma te lei o i le fono, sa ma talanoa ina ia ou malamalama i le mea na tupu ae ma te lei o.
Sa ma o i le fono. Sa ou faia fesili i le pule, i ni faamatalaga ma tuuaiga.
E lē gata i la‘u faalogo i tala fai mai ma uiga o upu, sa ou fesiligia le pule e ta‘u mai ia te au le tulafono lea e faaaogā. Sa ou fesili poo fea le notice ma isi mau fesili e tele.
O le tamā lea e ta‘ua i luga, na manuia le ma taumafai. O loo faigaluega pea i lana galuega ua toeitiiti luasefulu tausaga o faigaluega ai.
E lua vaega o le tulafono ia tou silafia (1) Procedure (2) Substantive. O le (1) Procedure o le taimi lea o suesuega. O le taimi tāua tele lea auā a mafai ona aveese ai moliaga, e taugofie, faigofie, e itiiti le tupe ma laitiiti le taimi e alu ai. Aua le faatali se‘i loka oe, pe tuli oe ma le galuega, ona e fiti lea e sue se loia.