E lē o mea uma e tatau na tatou iloa ma tou silafia, e a‘oa‘oina mai i totonu o se aoga poo se faitauina o ni tusi. O nisi taimi, e tāua tele le vaai – e a‘oa‘oina ai tatou. E pei o le soifuaga faasamoa, e tele mea sa a‘oa‘oina e nai o tatou tuua mai le vaai (observe). Sa vaai i le tausiga o aiga ma le faiga o tiute faamatai poo le tautua faataulealea. O le talitonuga foi o tagata atamamai, o le lima tausaga muamua lava o soo se tamaitiiti, na te a‘oa‘oina le tele o mea e ala i lana vaai.
E faapea le perofeta o Ieremia, sa ia a‘oa‘oina se lesona aogā i le matamata i galuega sa faia e le tagata fai-ipu omea. Sa ia maitauina ai, o se eleele (clay) sa gaosia ai se ipu, ae e lei lelei lea ipu.
Ona tago lea o le fai-ipu ma toe faaleaga le ele ae toe fau ai se isi ipu fou. E lei tiaiina e le fai-ipu le eleele ua leaga, ae sa toe faaaogā e fausia ai se ipu fou. O i sa iloa ai e Ieremia, e faapea le va feagai o le Atua ma le nuu o Isaraelu.
Se‘i o tatou manatunatu pea la i galuega a le fai-ipu omea, poo ā ni lesona tatou te maua mai ai.
1. Tatou te iloa mai ai le finagalo lilo o le Atua.
O le ele filifilia e le fai-ipu sa ia galueaina, e lei tino mai e tusa ma le mea sa faananau i ai le fai ipu. Atonu o se isi vaega o lea ele e malō tele, e fai ma mea e lē sagatonu ai le ipu sa manao e fai. E iai la le aiātatau a le fai-ipu e lafoai ai i fafo lea fasi ele ua lē aogā, peitai e leai.
O le ata o Isaraelu sa osi feagaiga ma le Atua, ae e tele ina lē usiusitai ma faalogotata, ae sa faapalepale pea ma onosai le Atua i ona tagata filifilia. E faigofie i le Atua ona lafoai Isaraelu ae toe filifili se isi nuu e osi feagaiga i ai. Ae leai, sa tumau pea le faamaoni o le Atua i lana feagaiga ma lana upu.
Ae mo tatou o tagata o nuu ese, e lē avea le natura pa‘ū ma le soifuaga agasala o tatou e lafoai ai tatou e le Atua. Na te lē faatagaina le faafanoga e oo mai, ae tuu avanoa pea ia toe maua se isi amataga fou e ala i le salamō.
2. Tatou te iloa mai ai le Mana faaola o le Atua.
I le matamata a Ieremia, sa ia iloa ai, e i le fai-ipu le pule ma le malosi e suia ai se ipu faaletonu ia toe fafau e fai ma ipu matagofie.
E faapea le alofa tunoa o le Atua, na te mafaia ona suia tatou ia avea ma tagata lelei e ala i le faatuatua. Ina ua valaau e le Atua Aperaamo ia tuua Uro i Kaletaia, sa ia folafola i ai e fai o ia ma nuu tele. E ui lava la i le lē faatuatua o tagata o Isaraelu, sa lē solia ai e le Atua lana folafolaga ia Aperaamo.
O le alofa tunoa ua tele naua. Auā foi e leai se mauga maualuga, poo se alia loloto e lē mafai ona oo atu i ai le alofa faamaligi o le Atua. O loo ia te ia le pule ma le mana e faamagalo ai soo se agasala pe afai tatou te liliu atu ma le loto salamō.
3. Tatou te iloa mai ai le olioli o le Atua
Sa faafiafiaina le fai-ipu ina ua vaai atu ua manaia lana galuega sa fai. Sa iloa atu ai e Ieremia le fiafia i fofoga o le fai-ipu, ona ua ata mai le mea sa i totonu o lona loto, lea ua atagia mai i le ipu manaia.
E faapea le va feagai ai o le Atua ma Isaraelu. E ui i lo latou faalogotata, ae a salamō ma liliu i le Atua, e matuā olioli ma le fiafia le finagalo o le Atua.
O le taimi lava e salamō ai Isaraelu, e tele ni manuia ma ni luitau e manumalo ai, e pei o le faatoilaloina o ona fili. E leai se isi mea sa sili ona olioli ai le finagalo o le Atua, pe a salamō ona tagata.
Sa fai e Iesu se faataoto i le tupe na leiloa, mamoe na leiloa ma le atalii na leiloa. O nei faataoto, e tasi lo latou taunuuga fiafia, sa toe maua ma fai ai se fiafia tele. Sa toe maua le tupe, toe maua le mamoe, toe maua ma le atalii – ma sa faaalia le fiafia i le fai o faiga‘ai e faamanatu ai.
E ta‘u mai ia i tatou, o se mea e olioli tele ai le finagalo o le Atua, pe a tatou salamō ma toe foi atu i lona aiga. Pe afai tatou te salamō mai a tatou agasala, ma faatuatua ma le loto atoa i le togiola na saunia e Iesu.
Samoa e, o loo galue pea le Atua ina ia liliuina tatou e tusa ma le faamoemoe na faia ai tatou.
E le faigata i le Atua ona soloiesea le lalolagi atoa ma toe amata se isi amataga fou. Ae ona o le Atua e faamaoni i ana folafolaga, o loo onosai ai ina ia salamō tagata uma.
E lē mafai e le ele na o ia, ona liua o ia e avea ma ipu matagofie. Seiloga e tago lima o le fai-ipu i le eleele, ma fai ai se ipu manaia ona aogā lea o le eleele.
E faapena tatou, e lē mafai e tatou ona fai i tatou ma tagata aoga, seiloga e tuu atu tatou i aao o le Atua, na te mafai ona fausia tatou ia fai ma tagata aogā.
Soifua.
