A oti i le fia valaau i le igoa o Siaki, ae tau popole foi nei valaau atu ae osofai mai o ia. Peitai e toe liliu loa le fafine o le toe foi mai i le potu malolo, ae ona iloa atu loa lona toalua o loo saofai e u mai le papatua, i se nofoa i le faapaologa i fafo i le pito i tua o le latou fale.
Na savali atu le fafine, e aunoa ma se upu, a o u mai pea le patua o le tamaloa e pei lava na te le o lagona le alu atu a le fafine. Maeu se fafine ina a uiga tamalii. E ui i sona loto tiga i uiga tufanua o lona toalua ua amata ona aliali, ae na savali sao atu lava le fafine fusi mau mai le ua o lona toalua ma sogi faalausosoo atu i ai, ma faasolo sasau atu i ai le faatoesega i le tuai o le meaai, aemaise lona taunuu mai i le fale e le o iai.
E lei toe matala ese lima o Pamela mai lona fusi mau i lona toalua, ma i le taimi lena i le tamaloa, ua pei o timuto le maligi ifo o loimata, ma taumafai ae loa e toso atu lona toalua e faasaofai i luga o ona vae.
O le aso foi lena na faatoa malamalama lelei ai Pamela i le mafuaaga uma o uiga nei ua iai lona toalua, ua faapuapuagatia e lagona ua le saogalemu, i le popole nei meaane ua toe sui le alofa o Pamela ia te ia. Ua pei ua toe faia tautoga a le ulugalii i le aso o le la faaipoipoga, ma o upu tonu nei o loo fia faalogo i ai Siaki. O le aso lava foi lena, na muta ai ma uiga masalosalo o le tamaloa i lona toalua.
