E faamanatu foi e le tina o Pamela i lana tama le fautuaga masani a le Tusi Paia, ‘o le tali filemu e liliueseina ai le ita.’
O mafaufauga nei ua feteenai solo mai i le mafaufau o le fafine o Pamela, ma na vela uma loa le kuka ma faamama mea uma i le umukuka ma toe seti ma le la laulau, ona agai loa lea i lo la potu sei vaai poo a mea a le leona feai o loo fai. Na alu atu le fafine ma taumafai e tatala lemu le faitotoa o le potu, ae na tei i le tatala atu, e le o iai le tamaloa i totonu. Na faapea le fafine ai o nofonofo i se pito i fafo o le fale, ma ua ia le mautinoa nei foi pe toe faaauau ona alu e sue.
Na tonu ia Pamela, o le a sei alu e taele, atonu o se vaipanoa lelei lea e faamalu ai lona tino ma sei toe faafilemu lona mafaufau. E mautinoa o se avanoa moni lea na foai e le Atua i le fafine mafatia. Aua e uma ane lana faamaluga, ua amata ona toafilemu ona faalogona, ma ua maua foi mafaufauga fou ma mafaufauga filemu.
Ua teu le fafine i ana teuga ua atili ai le lalelei, lea e pei o le auga tonu lea o uiga fou o le tamaloa, ona o le fua lava aua e vaai atu, o fafine uma foi a faasolo ina matutua, ua tau mou atu foliga momosi ia na amata tosina i ai a o teinemuli. Peitai o le fafine o Pamela, ua savali i le 32 ona tausaga, ae peiseai o loo tumau pea lona lalelei ma faateteleina, i le vaaiga a le tamaloa o Siaki.
Ae o le faaletonu o aumea a le tamaloa, o le tele o taimi e ula ai uo a le alii i si toeaina o Siaki, o lea ua agai atu i lona 40 ma ua iai foi suiga i foliga, ae o loo tilotilo lava taulelea i le lalelei o lona faletua.
Na maea loa ona tapena uma le fafine, ona savalivali lemu atu lea sei siaki i isi vaega o le fale, poo fea o iai lona toalua. Na siaki atu i isi potu e lua o le fale, e leai lava se isi, ma ua amata ona tau polepole le fafine.
