O loo toe faatulaga lelei pea e Pamela, mea na tauai solo e le tamaloa i lalo. Ua savali atu ma le pulumu ma salusalu mama ese fasi tioata o ipu malamalama ia ua taei. Na uma lelei ona toe faatulaga le fale, ona agai mai loa lea o Pamela i le umukuka e tope lana meaai.
O le manatu o le fafine, ai ua moe le tamaloa fua i le leai o se pisa ane i lea taimi. Ona faasolo ai lava lea o lana kuka, ma ua le iloga se mea e topetope solo ai lima o si fafine i le faiga o lana meaai. E manaia lava le kuka sa fuafua Pamela e fai mo lana tane i lena aso, ma ua faanoanoa ona o lea ua muamua faavevesi e Siaki lo la afiafi, ae sa iai lona faamoemoe ia manava mai lona toalua ua sasala atu le manogi o lana kuka faa-Taialani lea e fai, ma sa manao foi ia vave ona fai ana teuga ma faamanogi manaia lona tino e faafeiloai ai lana tane.
E faasolo lava le kuka, a o mafaufauga o Pamela o loo feofeoai solo, poo le a le auala lea o le a alu ai e toe faalelei faalogona o lona toalua, ina ia aveese le ita ae sauni mai mo le la taumafataga. I le taimi e tasi, e toe lagalaga ae lava le ita o le fafine, ona o lea foi ua toe maumau atu isi ana mea mananaia e teu ai lona fale, ma ipu taugata a si ona tina na aumai mo ia, a o lea ua oo i ai le faasologa o le maemaea o Siaki.
A oo la Pamela i lagona ita, ona faapea lea, ‘tuu ai pea e moe, e uma loa lau kuka ou ai au, faitalia ai lava ia ma le taimi e sau ai e ai.’ Ae i le isi foi itu, e toe tau lona manatu i upu apoapoai a si ona tina, ‘Pamela, poo ai lava le tamaloa fai mai ua pei o le leona feai le ita, ae gase ifo lava gau le siusiu e pei o le taifau, pe a poto lona toalua e fai.
