Peitai e maitau lelei le fafine, o le 3 o tausaga talu ona nonofo, ae amata loa ona ia vaaia ni suiga i lona toalua, ua toe matele i ana uo sa iai muamua a o la lei faaipoipo, o tama sa latou aooga faatasi, ma ua tele ai foi ina manava mai ua po, ma o nisi lava aso e moe lava si fafine e lei taunuu ane le galuega a Siaki.
Ma ua iai foi ona uiga fou ia ua amata ona iai, o le ita ma tauai solo mea i totonu o le fale, pe a tuai se meaai, aemaise lava pe a manava mai e lei vela le kuka a si fafine, ona ote leotele lea ma faamasino le fafine poo fea na alu i ai i le aso atoa, poo ai foi na avatu i le fale, fua i le tuai o lana gaoioi. Ua fiu foi si fafine e faamaoni ma faamatala i ai mea moni, ua faigata lava ona toe talitonu le tamaloa.
O lea faatoa toe tulai mai lea o se mea faapea talu mai le lua masina o le la vevesi mulimuli, na tau tapena ai lava mea a si fafine o Pamela o le a toe foi i lona aiga, ona ua fiu e taumafai e faamaoni i lona toalua, ae ua masalosalo vale lava le tamaloa.
Ua savali sao nei le fafine i tua i le umukuka ma tuu ese atu lana faatauga i luga o le fata, ona toe agai ane lea sei tau faamama ese mea nei ua fola solo i luga o le fale. E fai nei gaoioiga uma a le fafine, ae o loo faalogologo lelei mai lava i ai le tamaloa.
Ua le iloa e si fafine pe alu i ai i le potu e faafeiloai e pei o lana masani i aso uma pe a manava mai le tamaloa, e tatau lava ona ulufale mai i le fale, ua uma ona seti lelei atu le laulauai, ae ua maea foi ona toe faamama lelei e si fafine ona foliga e faafeiloai atu ai le taunuu mai a lona toalua.
