O le taimi lava na tatala mai ai e le fafine o Pamela le faitotoa o le fale, na ia iloa mai ai le faaletonu lea ua tupu. Na ia vaaia le fola solo atu o mea i luga o le fola o le fale, o loo nuti foi se ipu malamalama i le auala e savali mai ai i totonu. Ua amata ona tatavale le loto o le fafine, ua ia iloa lelei lava le mea lea ua tupu.
“Ai foi o le meaai,” o mafaufauga ia o si fafine a o taumafai e laalaa mai i totonu ma lana faatauga o loo afisi. Ua iloa nei e le fafine, o lea ua i le fale lona toalua, le tamaloa o Siaki, ae le o le taimi lea e masani ona manava mai ai.
O lea foi sa fuafua lelei lava e si fafine le taimi e alu ai e fai mai lana faatau ma fai lana kuka, a o lei manava mai lona matai saua. Peitai na fai sina tumu o le faleoloa i lea aso, lea e foliga ai ua fai sina ona tuai teisi mai i le fale, ae o lea lava na mautinoa e Pamela e le o tuai lana kuka.
Ina ua faatoa amata le aiga o Siaki ma Pamela, e pei o se ata faasolo i tagata o lea aai aemaise le aulotu i uiga fiafia ma le fealofani o le ulugalii. E moomoo uma isi tama ma teine talavou, talosia ia o latou maua ni tamaloloa e pei o Siaki, ma ni fafine e pei o Pamela. Ma o le mea moni lava lena sa iai le olaga o le ulugalii, e le na o taimi e iai i luma o isi tagata, ae oo lava foi i lo laua lava fale, e pei lava o se tama ma se teine faatoa fai se faigauo, i le auala alofa e fai ai e Siaki lona toalua.
