O le vasega faapitoa mo faiaoga taitai i totonu o aoga amata na amataina i le tausaga ua mavae atu mai le kuata muamua, lea ua faaiuina nei ma ua sauni atu mo le faauuga i le masina fou. O le iunite fou lea na tapena ma faatinoina e le MIT, ma o se fiafiaga tele i susuga i faiaoga na latou faatinoina ma faataunuuina lenei polokalame ona ua manuia nei ma o le a faauuina i latou na aooga ai.
O le pepa lenei e faapitoa mo i latou o loo umia tofiga taitai i totonu o aoga amata ua taua o le Firstline Management.
E tusa ma le 25 le intake poo i latou na taliaina ma filifilia mo le polokalame, peitai e uma ane le kuata muamua o le 2011 ua faamaamulu foi nisi, ona toe maua ai lea o avanoa e fa na faasalalau mai, lea na ofi atu ma mauaina ai e susuga i faiaoga o le tamaitai o Aarti Lal, Alice Kaleopa, Ana Nemaia ma Sayonara Faamausili.
O le isi tulaga lelei o lenei pepa ona sa maua ai sikolasipi na fesoasoani tele mo le faatupeina o le aoga.
Ia sa lei faigofie foi le tauasaina ma le faapaleniina o taimi mo le aoga, galuega, aiga ma le lotu ina ia mafai ona faamalieina uma vaega o le soifua tauivi, soifua galue, soifua mo le aiga aemaise foi o le soifua auauna mo le Atua. Ui lava i le tele o nei vaega sa tau faapaleniina, ae o lea foi ua tali faaaliali mai le alofa o le Atua, ina ua faaiuina taumafaiga ma ua mae‘a ai foi tauiviga.
O le naunautaiga lava o le faalauteleina pea o le silafia ma le malamalama mo le faatinoga o le galuega i totonu o aoga amata ina ia lelei ma manuia fanau o le lumanai. Ia ua a‘e malo nei foi la le seuga, aua o lele ua talia e i latou sa tauiviina lenei faamoemoe le taimi o le seleselega e ala i le sauniga o le faauuga i le masina fou, o le a faapea ane ai foi nai fanau ma aiga na tapuaia faiva, “Suga, Sole, malo le tau..”
O le po la o le Aso Lua na faia ai se aiga faamavae a lenei vasega faapitoa ma susuga i faiaoga na latou faafoeina ma aoaoina le pepa mo le tausaga atoa.
Ua iai foi le faamomeo e tatau ona iai pea se faaauauga o lenei mataupu e taua ma talafeagai lelei mo taitai o aoga amata.
O faamanuiaga mo i latou uma sa tauivi i lenei pepa, malo le tau, malo le onosai, malo foi le taumafai aua ua tau lau o le faamoemoe ua tini pao foi le uto, viia ma faafetaia le Atua soifua.
