Ua taoto le falalafo o Tumua ma Pule i ou paia Samoa ma ou mamalu aua ua taoto a o se ala ua oo. Ua ila ai nei le a‘i e pei o le faiva o matematega ma ua tini foi le uto e pei o le faiva o tapalega.
Ua aau Tu i Aau ae lē tu i peau, ma ua sina ai nei le galu ma le au peau i le pule to ma le agalelei faaauau pea o le Atua, ina ua silamiō alo ma fanau i augatupulaga auā o lea ua faafualoaina le soifua lagimaina ma le soifua laulelei o lo matou tina peleina o Soonalote Asi Leulua‘ialii Tanuvasa, ina ua aulia mai lona 99 tausaga o lona soifua. O le aso 20 o Setema 1913 na soifua mai ai Soonalote mai i ni mātua matagofie lava.
O le molimau maumaututu lava na saunoa i ai alo ma fanau o le tina matua ia Soonalote, na latou faamamafaina ai le tāua tele ma le matagofie o le tautua matavela i mātua, tausi matua aemaise lava o le soifua āva i mātua, lea ua faafualoaina ai ma faaumiumi ai lava le soifua manuia ma le soifua laulelei o si o latou tina, ua atoa nei le 99 o ona tausaga.
E molimauina o le tina sa aoga lava i aoga a le Ekalesia LMS seia faaiuina ma fai ai loa ma ana galuega le tautuaina o nai ona tuaa. E toasefuluvalu i latou na fananau mai i le tina ma si ana tamafai o lona grand-daughter ona sefuluiva faatasi ai lea o ona alo, e lima alii ae sefulufā tamaitai. Ua fa augatupulaga i totonu o le siosiomaga o le aiga ma o le aofaiga atoa o i latou ua tutupu mai i le tina ia Soonalote ua 667. Oka-oka faamanuiaga a le Atua ia Soonalote, ma o se mitamitaga sili foi lea i alo ma fanau uma i totonu o le aiga ona o le tausiga faaauau pea a le Atua i si o latou tina. O le mea lea e mitamita fai a‘e ai loto ma agaga o le fanau uma ona o nei tausaga e tele ua faamanuiaina ai oe lo matou tina pele e le Atua e tusa ma lou soifua.
O a matou tatalo, ia saga tausia pea oe e le Atua i ona aao alofa ma ia toe faaopoopoina pea nisi tausaga se tele o lou soifua tatou te saga mafuta ai pea i lenei soifuaga. Manuia tele lou aso soifua tina, Soonalote Asi Leulua‘ialii Tanuvasa. Alofaaga e tumau pea mo oe mai lau fanau uma ae faasilisili ai moomooga alofa mo oe mai ia i latou uma na tutupu mai ia te oe.
