Kenese 50:20 “A o outou, na fai togafiti e outou ia leaga ai a‘u; a o le Atua, na finagalo ia iu i le lelei, ina ia oo ina faaolaina o le nuu e toatele, pei ona taunuu ai i ona po nei.”
E tumu le Tusi Paia i tala o tagata eseese sa feliuaina e le Atua, pei o tupu, o faifaiva, o faifaatoaga, o perofeta ma isi, o loo faaalia o latou vaivaiga agasala, ae sa fai ma auro a le Atua.
O Noa sa onā. O Aperaamo, Isaako ma Iakopo sa talapepelo uma e faaufiufi ai faaletonu. O Mose sa ia fasiotia le tagata Aikupito. O Tavita sa mulilua. O Solomona sa pologa i le tele o ana avā. O Peteru sa faafiti ma sisi‘o na te lē iloa Iesu. O Ioane le Papatiso sa oo i ai le masalosalo poo Iesu moni lea ina ua fetaiai ma faigata. Ma le anoanoai o faataitaiga o loo momoli mai e le Tusi Paia, ua lē natia ai agasala a latou uma nei.
O le tatou matua autū o loo aliali mai ai le alii talavou o Iosefa, e numera sefulu ma le tasi i le faasologa o le fanau a Iakopo. O le uiga o lona igoa, ua faaopoopo e Ieova, ma sa soifua seia oo i le 110 ona tausaga, ae lei iai se agasala sa ta‘ua ai lona igoa. Sa faaosoosoina ma agaleagaina, ae lei faaitiitia lona tauleleia pe aveesea ona mata mai le Atua.
Sa iai i le fale o lona tamā, e lei ta‘uleagaina. Sa iai i le fale o Potifara, e lei ta‘uleagaina foi, e oo lava i le falepuipui, e lei suia ai lava lona tulaga tauleleia sa iai.
E lei faaleagaina lona faatuatua e le tamaoaiga ma le ‘oa sa ia maua, e lei tupu foi se loto oona pe matau‘a ona o faigata ma tuua‘iga sa sau ai. Poo ā lava mea sa fetaiai ma ia, sa lē suia, o ia o le tagata tauleleia. O se tagata e ese mai lava i le toatele o tagata o loo ta‘ua e le Tusi Paia.
E lē taumateina o le mea lea ua tusitusia ai lona soifua e ala i le taitaiga a le Agaga Paia, e tutusa lelei le aofai o mataupu e faamatala ai lona soifua, ma Aperaamo, e tai sefulu ma le fa mataupu.
O loo faaata mai ai foi i lona soifua le soifuaga o Keriso. O faataitaiga ma faatusatusaga e aliali mai ai nisi o uiga lelei o le soifua o Iosefa, o loo faamatalaina ai le soifua o le Alii Faaola.
O ia foi o se faataitaiga lelei mo tatou, auā e lei suia lona tauleleia ina ua tofotofoina. Sa tumau i le faatuatua, ma faaalia ai le mamalu o le Atua i lona soifua i taimi uma. O le molimau a le Tusi Paia, sa iai le aao faamanuia o le Atua ia Iosefa i mea uma sa iai. Sa lei tuulafoaina e le Atua i taimi sa puapuagatia ai, ae sa talitonu; e galulue mea uma lava mo le manuia o latou o ē alolofa i le Atua.
Ina ua faafesagai ma ona uso, ua fefefe latou ma matata‘u, ua manatua lo latou agaleaga i lo latou uso o Iosefa. Ua latou mautinoa, ua feoti latou. Peitai, ua tali ane Iosefa i ona uso, “aua ne‘i matata‘u. A o outou, na fai togafiti e outou ia leaga ai a‘u; a o le Atua, na finagalo ia ia iu i le lelei, ina ia oo ina faaolaina o le nuu e toatele, pei ona taunuu ai i ona po nei.” Oka oka se loto ina a lelei. Leitioa a faatusa i ai le soifuaga o Iesu.
Ae lē na o tagata e pei o Iosefa sa faaaogāina e le Atua. E lē na o tama sasa‘o sa faaaogā e le Atua, sa faaaogā foi e le Atua ma tama sese. Ona o le Atua o ia e iai le pule aoao ma le mana faaola, na te liliuina le efuefu e fai ma auro mo lona mamalu.
Faataitaiga, ina ua saili e le Atua se aposetolo mo nuu ese, na te lei sailia i totonu o le Ekalesia. Sa saili le Atua i le mea e sili ona loloto ma le pogisa ona o le malosi o le tulafono, ma se‘i mai ai lē na ia filifilia ma toe fafau ma faafou e fai ma ipu filifilia o lona finagalo, o le auro e suafa ia Paulo.
Ina ua saili e le Atua se isi e sui tulaga ia Saulo, e lei saili e le Atua i totonu o le aigātupu ma ē taualoa o le malo, sa saili e le Atua i tuāpa o Peteleema, ma filifilia mai ai le tamaitiiti sa leoleo mamoe, fafau ma toe faafou, ma iu ina ta‘ua o le tagata e tutusa o la loto ma le Atua. O le auro, e suafa ia Tavita.
Ina ua saili le Atua se isi e taitai lona nuu mai Aikupito, na te lei filifilia se fitafitatau poo se polofesa, ae sa ia filifilia le toeaina ua valusefulu tausaga le matua, sa leoleo mamoe a le tamā o lana avā, ae se‘i mai ai e le Atua ma toe faafou mo le galuega fita. O le auro a le Atua e suafa ia Mose.
E tele tala faapea i le Tusi Paia, o loo tele foi ni tautinoga faapea i totonu o Ekalesia taitasi. O le faaaogāina ma le liliuina o tatou e le Atua ae faaaogā mo lona finagalo. E ui i lo tatou matagā ma le maualalo, ae mafai lava ona ia liliuina ma toe faafou tatou e fai ma auro mo lona viiga.
Poo le ā lava le ituaiga tagata e iai oe, o le taimi e salamō ai, ma liliu ese mai ala leaga ma talia lona valaau mai, o le taimi lava foi lea fai ai oe ma auro e tauleleia, ma avea oe o se tagata fou i totonu o lona aiga. Soifua.
