E lei umi se saunoaga a le susuga i le Taitai Aoao o le Ekalesia Worship Center le susuga i le faafeagaiga ia Viliamu Mafoe i lana lauga i le aso ananafi, peitai ose lauga e mafai ona faamatalaina ose saunoaga e tuusao ma e le alo foi le mea moni.
E faapena se lagona ina ua ou nofo ma faalogologo ma le totoa i le saunoaga a le susuga Viliamu. E le alo le amiotonu e uiga i le Upu a le Atua.
E le tau sailia mai foi ni upu e faalafi ai ni lagona o le feau moni mai le Alii e tatau ona momoli i le gagana tuusao.
“Lau susuga i le faafeagaiga Malaki ma lou faletua, o le Ekalesia lenei o le Ekalesia a le Atua.
Ia aua lava nei lua taumafai e galulue ma se lua manatu ose lua ekalesia.
O Iesu Keriso o Ia o le Papa e faavae ai lana Ekalesia, ma o le Atua foi Nate atinaaeina ae le o le tagata.
Afai foi ae oo mai le taimi ua finagalo le Atua ua tatau ona agai atu i se isi foi vaega e faataunuu ai Lona finagalo, ia usitai ma o ae tuu le galuega a le Atua”.
O se vaega lea o le saunoaga a le susuga i le faafeagaiga Ps Viliamu Mafoe i lana lauga i le osiga feagaiga a le susuga i le faafeagaiga ia Malaki Isaako ma le faletua ia Rosa atoa ai ma le Ekalesia Worship Center ua tatalaina nei i le pitonuu o Papakura.
E puupuu le feau, ae o le feau lava ua fetaui lelei ma le fatu ua totoina nei i eleele o Papakura.
O le aano atoa o le saunoaga a le susuga Viliamu, e taumafai loa le tagata e galueaina le ekalesia e tusa ai ma lona poto ma lona iloa, o iina la o le a le tupu ma ola ai le galuega a le Alii.
Na ia saunoa, e le tatau i se faifeau ona iai se lagona faapea, ae tatau ona taitai ekalesia e tusa ai ma le faasinomaga mai le Agaga Paia o le Atua o le ala lena e manuia ai.
O se tasi foi lea o tala sese o loo tauave pea e le toatele o tagata e pei ona saunoa iai Viliamu.
E faalogo loa o tau le igoa o le lotu Worship Center faimai loa ma tagata o le lotu a Viliamu, peitai e le ose lotu a ia, ae o le lotu a le Atua na faatonuina o Ia e tusa ai ma le taitaiga a le Agaga Paia ina ia faapea ona faatu ma atinaae e tusa ai ma le finagalo o le Atua.
Sa faamamafa foi i le saunoaga a le susuga Viliamu le tulaga e pei ona iai le va o le faifeau ma lona faletua ma le aulotu.
E ao i le faifeau ona alofa i le ekalesia, e faapea foi i le ekalesia ona tausi lelei ma alofa i le auauna a le Atua.
O le ekalesia ua tatalaina nei i Papakura, ose moemitiga sa faapea ona tuu e le agaga o le Atua i le loto o le susuga i le faafeagaiga ia Malaki i le tausaga 2004.
Talu mai lena tausaga sa tuu atu pea i le Alii i talosaga ma faatalitali ai i Lana faasinomaga, aua o le taimi a le Atua e atoatoa ma lelei lea mo le tagata.
O le tausaga na tea nei sa faapea ona agai atu ai le susuga Malaki ma le faletua ia Rosa ma nai o la alo i le ua amataina sauniga ma Aoga Tusi Paia i Papakura, se ia oo lava ina alofagiaina e le Atua le galuega ma maua aiga e pei ona ua amataina nei le ekalesia.
O le susuga i le faafeagaiga ia Malaki o se tasi o auauna ua leva ona galue mai i galuega faamisionare e pei ona amata mai i le Autalavou mo Keriso (YFC) i Samoa ma sei oo ina malaga mai i Niu Sila ma faaauau ai i le Faalapotopotoga o le PIN poo le Faalapotopotoga o Manaoga o Tagata lautele i le soifua faaleagaga.
Sa avea o ia ma Sui Faatonu o lea faalapotopotoga mo ni nai tausaga, mulimuli ane valaauina e le Atua e galue ose faifeau lagolago i le Ekalesia Halleluiah Worship Center i Otahuhu mo le silia i le sefulu tausaga.
O le ekalesia ua amataina nei o loo tatala le avanoa mo soo se tasi e mafai ona agai atu ma tapuai ai.
E le faailogaina se lanu ma se gagana, ae avanoa mo tagata uma o e o loo moomia se ekalesia e tapuai ma mafuta ai ma le Atua, ma fesoasoani ai foi i le itu faaleagaga.
