O le alofa o le uo

Ua faataga pupula ae nei Pio i ona foliga e peiseai ua tei, ma avau atu i teine e faaola mai si ana uo, a o taumafai le isi fomai e faaoleole le tagi pepelo a Pio lea ua fai ma tautau le igoa o Sogi. O lea ua alolofa uma nei fomai ia Pio, i lo latou manatu, atonu ua matua misia nei e Pio si ana uo.

Na maea ona tapena ese uma mea sa taoto ai si alii o Sogi, ma ua toe faatulaga lelei le moega mo se isi mai, ae faatalosaga loa Pio i teine fomai, pe mafai ona sui atu lona moega i le itu lea sa iai Sogi, e sili lena ia te ia le taoto tonu i le pito sa iai le moega o si ana uo, nai lo le mafatia i le vaai atu i ai i aso uma. Na talia lelei e fomai le manao o le alii le alofa o Pio ma tulei atu loa i ai lona moega.

Ua matua tau le mea tonu na naunau i ai Pio, ma ua iai foi lona mafaufau, o le a matua fosi lava lona taumafai e saofai i luga, e matamata i le lalelei o se vaaiga i fafo lea ua leva ona fiafia ai si ana uo o Sogi, ae o lea la ua oo nei i lona taimi. Na tuai lava ona fosi i luga le saofai a Pio o le lei o ese atu o teine fomai, aua na te iloa lelei e le faatagaina ona saofai na o ia.

Na tapuni mai loa e teine le faitotoa o le potu o le alii o Pio, amata loa ona taumafai malosi e nofo i luga. Tafefe, e matua uigaese le vaaiga lea ua vaai atu nei i ai Pio, ma le mea sa ia faatalitalia.

E lei talitonu ona mata ma ua ia matua lagona ai lava le salamo i le iuga ua oo i ai le la faigauo ma si ana uo faamaoni o Sogi. Ina ua atoa i luga le ulu o Pio ua ia iloa atu fafo o le faamalama, na faatoa ia iloa ai, e na o le puipui sima tele lava lea e faalava ane i le isi itu, ma e aunoa ma se mea manaia e mafai ona ia iloa atu ai.

Ua na o le faataupupula atu o le alii o Pio i fafo, ma e lei umi lava ae toe taoto ifo loa i lalo. Ua tagi Pio, ua toe salamo i lona agaleaga i si tama o Sogi, ma lona talotalo lea na iai ina ia oti Sogi ae maua e ia le moega.

O ina lava na faatoa iloa ai e Pio, o le taimi atoa lea sa faamatala mai ai e Sogi le mau vaaiga matagofie eseese ia te ia, e foliga mai o ni mea lava sa fatu e Sogi, ina ia faafiafia ai o ia.

Ua toe faasolo uma mafaufauga o Pio i le tele o aso sa ata ai ma faamalieina lona fia faitala, i tala malie ma upu susua sa faamatala ane ai e si ana uo le tele o mea ia te ia. Ua tagi lava le alii o Pio ma taotooto, seia oo ina taunuu ane le fomai, ma ia faamatala loa i ai le mea atoa na tupu ia te ia ma si ana uo.