O le alofa o le uo

Ua tau iai sina suiga ua iloa e Sogi i lana uo. O le tele o taimi, e ui lava i le taumafai o Sogi e talanoa ma faamatala atu mea ia Pio, ae ua ia vaaia lava le na o le taotooto o le alii o Pio, e pei e le o ano ane i lana talanoa atu.

Peitai e lei foi ai lava Sogi i lana masani o le faafiafia o si ona uso mai, ae paga lea, ua matua malolosi ae lava lagona matau‘a o Pio, ma ua iai foi ona lagona faufau leaga i si ana uo o Sogi, ua talotalo talosia ia vave ona oo mai se aso e oti ai Sogi, sei ona maua le pito lea o le faamalama.

Na tau lava moomooga o Pio. O le vaiaso tonu lava lea ua latalata i le faamanatuina o se tasi o aso faapitoa i le atunuu o Oseteria, ma ua atili ai le matau‘a o Pio, aua ua ia iloa, o le a matamata lelei lava Sogi i mea uma ia o le a faagasolo ane i le auala, ae o ia o le a na o le taliaga foi ma faalogologo. Peitai pe tusa o le vaeluaga o le po o le aso lea, ae faalogoina loa e Pio ua tasoo lava le tale a si ana uo. Ua le na o se tale masani, ae foliga o loo iai se faaletonu ia Sogi.

O le mea masani, afai e tupu se faaletonu faapea i se tasi o laua, e mataala lava le isi e vave ona oomi le faamau mo le moli faailoilo lea e i luma i le potu o fomai, ona faavave mai lea o se isi e siaki se mea o tupu i se gasegase. Peitai o le po lea, ua tiga lava ona avau le tale o si tama o Sogi, ae ua faataga moeiina lava Pio e pei o se tagata ua matua gase le moe.

Na lagona lelei e Pio o loo tau alaga ane si ana uo mo lana fesoasoani, ae leai lava se ano i ai o le alii o Pio. Pe atoa le itula o oi pea si alii o Sogi i ona tiga, ae le toe faaloina loa e Pio se leo mai le moega o si ana uo.

Sa faataga faasasao pea le moe a Pio mo se afa itula, ona faatoa faasepasepa atu lea i le pito o iai Sogi, ma i lana vaai, e pei lava ua to le mānava a si tama. Talofa e ia Sogi, i le tele o aso sa ia faia ai se galuega lelei mo lana uo , ae o lea ua luluti ona tiga ma o se taimi muamua lea ua ia moomia ai le fesoasoani a lana uo, ae ua talitualimaina o ia.

Na faataga moe ai lava lea o le alii o Pio, ma e tusa o le itula e fa i le vaveao, faalogoina loa e Pio ua pisa teine fomai i autafa o le moega o Sogi.