Faatalofa atu Samoa lou atunuu pele i lenei foi vaiaso fou. Viia le alofa ma le agalelei o lo tatou matai sili i le lagi, ona e talitonu o loo faatofutofusia uma i tatou i lona alofa ma lona agalelei faasoa mai. E ui foi ina afatia le folauga i luitau o le olaga nei, ma tauau ai ina leai so tatou faamoemoe, ae faafetai o loo folafola mai lava le Tusi Paia, e leai lava se mea e mafai ona faateaeseina i tatou mai le alofa o le Atua ia Keriso Iesu.
O le mafuaaga lena Samoa e ao ai ona tatou matua viia lo tatou Atua, aua e le o se tagata na folafola mai, a o le Atua. O le natura lava o le tagata e femoumouai ma lē faamaoni i folafolaga fai, a o le Atua o ia e le o se tagata e pepelo ai, e faamaoni foi o Ia e faataunuu ana folafolaga uma ua ia folafola mai ia i tatou.
Ioane 3:16 “Aua ua faapea lava ona alofa mai o le Atua i le lalolagi, ua ia auina mai ai lona atalii pele e toatasi, ina ia le fano se tasi e faatuatua ia te ia, a ia maua e ia le ola e faavavau.”
O se vaiaso taua tele lenei vaiaso i le au Kerisiano uma ona o se vaiaso tatou te toe manatunatu ai i le galuega maeaea na faia e le Atua mo oe ma au i luga o le satauro. O se galuega e le faigofie, o se alofa ina a tele, o le totogi o le agasala a le isi tagata e le o se mea faigofie. Ae faafetai aua o le Atua o le alofa lava ia, ma o lona natura foi lena. E moni ai le pese a tamaiti, o le alofa o le Atua e ofoofogia, e maualuga e te le aeina, e maualalo e te le mauluina, e lautele e te le opoina, o le alofa lena o le Atua mo oe ma au.
O le tatalo a le Taiala, ia matala o tatou mata faaleagaga ina ia mafai ona tatou malamalama i le loloto ma le lautele, o le maualuga ma le ofoofogia o le alofa le faatuaoia o le Atua mo i tatou lana fanau agasala.
A o ou manatunatu i lenei vaiaso i le matautia o lenei alofa, sa faapena ona faamanatu mai e le agaga o le Atua ia te au le eseesega o le alofa o le tagata, ma le alofa o le Atua. O le alofa o le tagata e iai tuaoi, o le tele o i tatou, tatou te alolofa ia i latou e alolofa mai ia tatou, o nisi foi taimi tatou te alolofa i tagata e maua mai ai a tatou mea, pe tatou te alolofa foi na o i latou tatou te aiga ma faauo i ai, peitai o le alofa o le Atua, e tusa ai ma lana afioga ua folafola mai i upu tomua o lenei vaiaso, “Aua ua faapea lava ona alofa mai o le Atua i le lalolagi, ua ia auina mai ai lona atalii pele e toatasi, ina ia le fano se tasi e faatuatua ia te ia, a ia maua e ia le ola e faavavau.”
Samoa e, o le alofa lena o le Atua mo i tatou, ua ia le faasaoina ai lona atalii pele e toatasi, ae ua maliu i luga o le satauro, o le faailoga o le mataga ma le toilalo, ina ia faaolaina oe ma au le tagata agasala. Fai mai le afioga a le Atua, o i tatou uma sa pei o mamoe ua se, ua taitasi ma faasaga i lona lava ala, a ua faaoo ia te ia e le Alii le amio leaga a i tatou uma. Na faasauaina o ia , sa tigaina foi o ia, ae le tautala mai o ia, e pei o le tamai mamoe ua taitaiina ia fasia, e pei o le mamoe i luma o e sele lona fulufulu, ua faalologo ia, o ia foi ua le tautala mai.
O le fesili Samoa – pe o le a ea sau tali atu i le alofa o le Atua mo oe? Ua ia totogi la tatou agasala, o i tatou sa tatau ona oti, peitai ua oti o ia e suitulaga ia i tatou. Se alofa ina a tele, ae o le a ea lau tali atu i le alofa lena?
O le tatalo a le Taiala, ia taua i lou loto le maliu o Iesu e pei ona tatou faamanatuina i lea tausaga ma lea tausaga. Aua nei avea o se aso malolo pe o se e masani ai, a ia fou ma ia ola le galuega faaola a lo tatou Alii i loto ma finagalo. Ua ia sasaa mai lona soifua ina ia maua e oe ma au le atoatoa o lona malo.
O lona finagalo ia tatou oo atu i lona manuia e faavavau. Ua faamativaina o ia ina ia faatamaoaigaina i tatou. Ua faamaina o ia ina ia tauleleia i tatou. Ua puapuagatia o ia ina ia faasaolotoina i tatou. Sa inosia o ia ina ia alofaina i tatou. O ia lava sa leiloa se agasala ua avea ma agasala ina ia faaolaina i tatou.
Samoa e, ia alofa le Atua ma faamalamalama atu le feau o le Eseta i loto ma finagalo ina ia tatou talia le mea alofa foai fua a le Atua, ma ia tatou oo atu i lona manuia ua folafola mai, o le ola lava lea e faavavau. Manuia tele lenei vaiaso Samoa ……
