“Ona e le mamao tele ese lo matou fale mai iinei, sa ma le popole tele ma lou toalua pe a fai mai le ma fanau e fia o mai e tafafao iinei i le paka. Atonu sa iai sina o ma popole i tamaiti, ae lei lava lena popole e muamua ae nai lo le ma popole atu ia ma galuega ma isi mea sa ma faamuamua ona uai atu i ai. O le mea na tupu, na lavea lou atalii i ni tuuga uila a nisi tamaiti matutua, a o vilivili solo lava lana uila iinei e pei o le mea lea e fai mai e si ou afafine.
“O ina na faatoa ma toe salamo ai, i le leai o se isi o maua e sau e vaavaai le ma fanau a o tafafao na o laua. Na ma mautinoa ai, e ui lava e na o se lima pe sefulu minute e tuu mai ai i laua e o mai, ae e pei lava o le emo o le mata le mou ese atu o se ola taua, pe a le matala matua e vaavaai lelei.
O le lima minute lea sa finau mai ai pea e fia fai ai lana uila, ou te manatu i ai, e le o se lima minute ua ou faamaimauina, ae ua toe aumai ma faaopoopo mai ai ia te au se isi lima minute, ou te vaavaai atu ma ou molimauina ai pea le tuputupu ae o si ou afafine.
“Afai ae ola ae ma matua, ma poo le a foi le finagalo o le Atua ia te ia, pe fai sona aiga ma alu ese mai mai ona matua, o le a ou le toe maua gofie se lima minute e vaai ai ia te ia ma matauina ona uiga eseese. O le ala lea ou te faataua uma ai minute eseese o lona tuputupu ae.”
A o fai atu faamatalaga nei a le tamaloa o Palauni, sa ia vaaia le maligiligi o loimata o le fafine o Sera, ma tilotilo atu foi o ia i si ana fanau lea o loo taufetuli solo mai lalo o le taupega. Na matua goto i le loto o le fafine o Sera lagona faaleo o le tamaloa o Palauni, ona ia faafetai ane lea i ai, mo lea avanoa matagofie ua ia faasoa atu ai se lesona aoga mo lona ia foi matua.
Na uma loa le lima minute mulimuli a le afafine o Palauni, ona agai mai loa lea i lona tama a o tilotilo atu i ai le fafine o Sera ma ona foliga alofa. “Suiti, amuia oe e te maua se tama e ese le alofa ia te oe.”
Na faamavae mai le tamaloa o Palauni i le fafine o Sera ma savali ese atu loa a o vilivili atu i ona autafa le uila a lona afafine.
Talu mai lena aso, e lei toe galo i le fafine o Sera lenei aoaoga taua tele na ia maua mai ia Palauni, ma e oo lava ina ua matutua uma le fanau a Sera ma o ese atu ma le latou aiga, e le mafai ona tuulafoaia e le fafine lana fanau e o na o latou i se mea, e mulimuli ai lava si fafine.
Ma na matua lagona e tamaiti le uiga alofa lea o lo latou tina, na avea foi o se fusi e sili ona mafiafia le mafanafana ai o la latou mafutaga.
