E agai atu le savaliga a le fafine o Sera ma lana fanau i le malae taalo mo tamaiti, o loo nofonofo lava le tamaloa o Palauni i luga o le nofoa sima ma tilotilo atu i si ona afafine laititi lea e feaveaveai solo mai lana uila vilivae i luga o le auala e savavali ai tagata.
Na saofai ane Sera i le nofoa i le isi itu o le laulau, ona taufai tilotilo ai lava lea o le tagata ia i lana fanau a o tafafao solo tamaiti.
Na vaaia e Sera, e fai lava ma tilotilo Palauni i lana uati, ma toe tilotilo i lona afafine. “Suiti, sau loa ta o ua lava lena tafao, ua uma le taimi na ta o mai ai.” Na vaaia e le fafine o Sera le musua o le teineititi e sau i lona tama. “Se Papa, toe lima nisi minute ta o.”
Na lue atu le ulu o le tamaloa ona tilotilo ane lea ia Sera ma lulu le ulu ma ataata, ona ua malo foi lona afafine i le la finauga.
Foliga o lea sa faitau pea e le tamaloa le lima minute, aua na atoa loa, tu i luga le tamaloa o Palauni e peiseai o le a savali, ma toe valaau foi “Suiti, lava loa lena ae sau ta o.” Sa tilotilo Sera i le teineititi pe sau, ae leai, “Papa, toe lima lava minute ou alu atu loa.
Na vaai e le fafine o Sera, ua toe agai mai foi Palauni e saofai i le nofoa. I le matau a Sera, pe a ma le faalima o faia pea lenei feteenaiga i le va o le tamaloa ma lona afafine, ae folafola loa e le teineititi, “Papa, e moi lava au, toe lima lava ni minute ou alu atu loa ta o i le fale.”
Ua matua ofo le fafine o Sera i le lē fiugofie o le tamaloa i lona afafine. A o toe saofai ifo Palauni i lona nofoa ma tilotilo mai ia Sera, na ataata le fafine ma faapea atu, “E ese le lava o lou onosai i si ou afafine. E le lau maua ni tama e pei o oe. I la‘u matau, o le faalima ai lena ona e tauanau lou afafine e te la o, ae o loo e onosaia pea lona naunau e fia fai lana uila.”
Na ataata si tamaloa o Palauni e lei faia sana tala. Na ona punou ifo ma toe tilotilo i lona afafine, ona liliu mai lea ia Sera ma faapea atu i ai, “O le taimi tonu lenei i le lua tausaga talu ai, na uma ai le ola i si ou atalii matua, ae na oti i lona fa tausaga, e pei lava foi o le matua ua iai nei lou afafine lea. Talu mai lena aso, sa ou folafola ma tautino i le Atua, ou te le toe faia lava le mea sese na ou faia muamua ma ua maumau ai le ola o si ou atalii.”
