O le alofa e afua mai ai faamanuiaga – Lawrence Tauasa

O le mafuta atu o fanau a Samoa i nisi tamaiti e ono suia ai uiga o a tatou fanau mai Faavae faaleaiga, aganuu ma tapuaiga. E ono suia ai foi le alofa foai ma le tausi matua, uso ma tuafāfine o nisi. Ae peitai na saunoa se tasi o amepasa iloga a Samoa i Sini ia Lawrence Tauasa, “A leai se alofa o totoe o le a faigata ni manuia o le a maua e fanau ma tupulaga o loo soifua ane i atunuu mamao e aofia ai Ausetalia.”
O le susuga ia Lawrence Tauasa e fā fusi o le Lalolagi o loo ia umia i faipelega.
O le tolu mai le aupaga o le Cruiserweight ma le tasi mai le aupaga Heavyweight e aofia ai le Fusi a le WBO, HBO, UBO ma le PABA. O se tasi na faatalatalanoa e le Leitio Samoa Sportstar Show e uiga i le puipuiga o tupulaga mai faalavelave e aafia ai.
“O le tamaitiiti Samoa lava ia, o le faalogo i mātua ma le loto alofa e mafua uma ai ona manuia. I lo‘u laitiiti mai sa faigata ae peitai na a‘oa‘o lava matou e lo matou tamā i le usiusitai ma le alofa.”
“Na ou fanau i Samoa ma isi o‘u uso ma tuafāfine ma e lei tele ni avanoa ma tulaga ua iai nei atunuu. Sa lē vaaia tele foi le itu lea o le fulitua o fanau i matua.” O lo tatou olaga sa iai o le faalogo lava i faatonuga pe faigata pe leai ae o le mea sili lava o le faataunuu.”
“I lenei talutalu fou ua matauina suiga e pei o le tali soo o fanau i faatonuga a mātua ma tulai mai nisi finauga. I vaitaimi o tatou tuputupu a‘e e pei o se tapu le toe tali atu i se upu a nai mātua. I atunuu ua o tatou soifua ai nei…o se mea masani lea i isi o mātua palagi.”
“O taimi ia o laiti e te vaai atu i ou mātua o loo galulue mo le tausiga o le aiga ma o lou sao i nai ou mātua o le fesoasoani lea i feau ma galuega o loo nafa ma i latou.
A ou toe manatu atu i taumafaiga a nai mātua e momomo le loto ae viia pea le Atua ona o lo latou faasinoina mai o le ala tonu e ola ma auauna ai i tatou nei.
I tapenaga o a‘u fusuaga ou te mautinoa e faaluaina le malosi o la‘u koleni nai lo la‘u paga ia e mauaina le manumalo.” O nisi nei o mea lelei tatou te pue mai o tatou mātua auā a lē tigaina e lē ausia le sini.”
E talitonu Tauasa i le galue ona o lou alofa i ou mātua faapea foi i taaloga ia manatu alofa i le tapuaiga  a nai ou mātua. “O tele o taimi a ou vaai atu i nai o‘u tei laiti o tau faaletonu a latou amio, ou te fautua i ai i le igoa o mātua ma le aiga o loo latou tauaveina ma ia alolofa ia fai mea e tauleleia ai.”
O le galuega foi lea a Lawrence e fai i le tupulaga a lana ekalesia, ia tautuana mātua ma aiga auā o le amataga lea o mea lelei pe a maua e fanau le loto alofa.
O le masina o Aukuso e alo atu ai TAuasa mo leisi ana fusuaga ma e lē taumate le alofagia e aiga, Ekalesia faapea Samoa lona alofaiva auā o se tagata e alofa tele i lona atunuu.